Sport

E konfirmon agjenti, Arthur do largohet nga Juventus në verë


Agjenti i mesfushorit të Juventus-it, Arthur Melo, ka konfirmuar se braziliani do të largohet nga Torino në merkaton e ardhshme.

Kështu braziliani u bashkohet emrave si Paulo Dybala dhe Giorgio Chiellini që kanë zyrtarizuar largimet në verë nga “Zonja e Vjetër”.

Mesfushori erdhi nga Barcelona si shkëmbim me Miralem Pjanic. Ai ishte dëshirë e ish-trajnerit të Juventus-it, Maurizio Sarri-t. Agjenti i tij e pranon se nën urdhërat e Sarri-t, braziliani do të luante në rolin e Jorginho-s.

Aktualisht, Arthur nuk preferohet shumë nga trajneri, Massimiliano Allegri. Dhe sipas agjentit, kjo vjen për faktin se livornezi dëshiron dy mesfushorë fizik në lojë. Por shton se marrëdhënia mes tyre është e shkëlqyer.

Arthur në janar ishte pranë largimit nga Juventus-i dhe bashkimit me Arsenal-in. Por ndërhyrja e Allegri-t bëri që ai të mos lëvizte nga “Allianz Stadium”. Çfarë pritet të ndodh gjatë verës tashmë.

25-vjeçari këtë sezon është aktivizuar në 31 takime nën urdhërat e Allegri-t, teksa ka dhuruar vetëm një asist.

/Albanianpost.com

Lajmet kryesore