E djathta radikale në Evropë shkakton pasiguri edhe në Kosovë

Përderisa lëvizjet nacionaliste e populiste të krahut të djathtë përhapen në të gjithë Evropën, një ndjenjë përforcuese pasigurie ka kapluar edhe Kosovën, kryesisht për shkak të retorikës së tyre armiqësore ndaj vendit të vogël ballkanik, duke qenë se rrjetet evropiane të së djathtës ekstreme ushqehen nga flukset e dezinformatave ruse që në thelb kalojnë nëpërmjet Serbisë.

Zgjedhjet për Parlamentin Evropian (PE) që u mbajtën këtë muaj konfirmuan ngritjen e partive të ekstremit të djathtë në vendet anëtare të Bashkimit Evropian (BE), duke tronditur estabilishmentin aktual, ndërsa një fitore e mundshme e Donald Trumpit në zgjedhjet presidenciale në Shtetet e Bashkuara të Amerikës (SHBA) mund t’i përkeqësojë më tej gjërat.

Alternativa për Gjermaninë (AfD), një parti populiste, nacionaliste e euroskeptike, fitoi një numër të konsiderueshëm të votave në zgjedhjet evropiane, mjaftueshëm sa për të kapërcyer socialdemokratët e kancelarit gjerman, Olaf Scholz, ndërsa suksesi i Tubimit Kombëtar (RN) shtyu presidentin e Francës, Emmanuel Macron, drejt zgjedhjeve të reja nacionale.

Lëvizja Vetëvendosje (LVV), subjekti që udhëheq pushtetin ekzekutiv në Kosovë, u ka bërë thirrje bashkëatdhetarëve në diasportë të votojë kundër të djathtës ekstreme në zgjedhjet e jashtëzakonshme parlamentare në Francë, që pritet të mbahen midis 30 qershorit dhe 7 korrikut 2024, duke shprehur drojën për rrezikun që mund të kanoset Kosovës nga fitorja e RN-së.

E fitorja potenciale e së djathtës ekstreme në Francë – sondazhet e nxjerrin RN-në e Marine Le Penit fituese – në bazë të partisë kosovare në pushtet, përveç se do të rrezikojë “ëndrrën evropiane” të vendeve të Ballkanit Perëndimor, do t’i përhapë gjithashtu narrativat destruktrive ndaj Kosovës.

“Jemi të bindur që populli francez do të reduktojë mbështetjen e këtij kërcënimi të ekstremit të djathtë. Për këtë gjë, si asnjëherë më parë, është e nevojshme dhe e domosdoshme bashkimi i të majtës socialdemokrate si e vetmja mundësi për të ruajtur vlerat që janë ndërtuar me mund dhe sakrificë, sidomos pas Luftës së Dytë Botërore”, ka vlerësuar ky subjekt politik.

Megjithatë, nuk janë vetëm Franca e Gjermania ku e djathta ekstreme është në rritje, por edhe Austria. Partia Austriake e Lirisë (FPÖ), një prej forcave kryesore politike të ekstremit të djathtë, që në zgjedhjet e fundit për PE-në fitoi shumicën e votave në nivel vendi, ka hartuar një draft-rezolutë ku i kërkohet legjislativit austriak të deklarohet kundër pavarësisë së Kosovës.

“Kosova ka qenë pjesë e Serbisë derisa në kundërshtim me të drejtën ndërkombëtare u shkëput përmes bombardimeve të NATO-s në vitin 1999. Deri më sot, shumica e vendeve nuk e kanë njohur Kosovën si shtet të pavarur”, thuhet draft-rezoultë, derisa ngriten pretendime për shkeljen e Rezolutës 1244 të Këshillit të Sigurimit të Kombeve të Bashkuara (OKB).

FPÖ fitoi zgjedhjet e qershorit për legjislativin evropian dhe kryeson në sondazhe përpara zgjedhjeve kombëtare të Austrisë që priten të mbahen më 29 shtator 2024. Duke qenë se partitë e ekstremit të djathtë kanë shënuar rritje në vitet e fundit, shumë vëzhgues kanë tërhequr vërejtjen se kjo mund të sjellë ndryshime në qasjen e disa shteteve evropiane ndaj Kosovës.

Ndryshe, përkundër përparimit të ekstremit të djathtë në disa vende, përfshirë Belgjikën e Holandën – në Itali, Hungari, Sllovaki e Çeki, aktualisht pjesë e qeverisjes – dhe kontekstit të rëndë gjeopolitik pas agresionit rus në Ukrainë, partitë që konsiderohen tradicionalisht liberale dhe në njëfarë forme, mbështetëse të Kosovës, vazhdojnë të dominojnë skenën politike.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.