Jetesë & Stil

E bezdisshme apo e rrezikshme: Çfarë ndodh kur një mizë ulet mbi ushqim?


Ilustrim

Kur një mizë e bezdisshme ndalon në ushqimin tuaj, ju ndoshta e largoni atë dhe vazhdoni të hani sikur të mos kishte ndodhur asgjë.

Megjithatë, a është ky një vendim i mirë apo duhet të shqetësoheni pak më tepër për mikrobet të cilat ajo mund t’i bart në vaktin tuaj?

Ka të paktën 100 patogjenë të ndryshëm që mund të bartin mizat e shtëpisë, të tilla si bakteret, viruset dhe vezët e parazitëve, thotë Dr. Thomas J. Daniels, drejtor i Laboratorit të Qendrës Leëis Calder në Universitetin Fordham, shkruan për “The Healthy”.

Pasi miza i kap mikrobet, ajo mund t’i përhapë sëmundjet në disa mënyra. Bakteret dhe viruset në ushqimin e kontaminuar ngjiten në trupin e mizës dhe qimet e vogla në këmbët e saj. Kur ajo fluturon dhe zbret diku tjetër, si në ushqimin tuaj, ai lë disa nga ato mikrobe pas.

“Pra, ne jemi potencialisht në rrezik të infeksionit qoftë edhe nga një mizë e vetme shtëpiake kur ajo zbret në vaktin tonë, edhe pse sasia e patogjenit që ajo mban ka të ngjarë të jetë e vogël”, bën të ditur doktori.

Sipas doktorit ne duhet të shqetësohemi më shumë për zbarkimin e mizave në ushqim.

“Kur një mizë ulet në vaktin tuaj, ajo nuk thith copa të vogla ushqimi nga pjata juaj. Në vend të kësaj, insekti i mbanë në gojë lëngjet e tij tretëse për ta shpërbërë ushqimin aq sa të jetë në gjendje ta gëlltisë”, thotë Daniels.

Megjithatë, kjo nuk është pjesa më e keqe e këtij procesi.

Domethënë, të vjellat e mizës janë plot me mikrobe nga vakti i fundit. Dhe patogjenët brenda mizës jetojnë më gjatë se ato që ajo kapi me këmbët e saj, prandaj mikrobet nga të vjellat e mizës janë më të rrezikshëm për ne se gjithçka tjetër.

Cilat mikrobe përhapen nga mizat?

Disa nga mikrobet që mizat lënë pas janë mjaft të rrezikshme. Deri më tani, shkencëtarët e dinë se mizat mund të transmetojnë “Escherichia coli”, “salmonelën”, “hepatitin A” dhe “rotavirusin”, thotë Brent V. Larz, Ph.D, një specialist i sëmundjeve infektive.

Ekziston edhe Shigella, një grup bakteresh që mund të shkaktojnë diarre, ethe dhe dhimbje stomaku, gjë që është veçanërisht shqetësuese sepse nuk duhet shumë që kjo baktere t’i bëjë njerëzit të sëmuren.

Por, përpara se të filloni të hidhni të gjithë ushqimin mbi të cilin zbarkoi miza, mbani në mend se jo çdo mizë do të mbajë të gjitha ose ndonjë nga këto mikrobe. Mikrobet e përmendura janë kryesisht baktere dhe viruse fekale, të cilat nuk ekzistojnë në çdo gjë që hanë mizat.

“Një mizë duhet të ulet mbi mish të papërpunuar ose jashtëqitje për të transferuar këto baktere dhe viruse në ushqimin tuaj”, thotë Larz.

Pastroni dhe mbuloni

Sa më e pastër të jetë kuzhina juaj, aq më pak shanse do të ketë një mizë të hajë vaktin tuaj.

Përveç kësaj, vetëm një mizë në ushqimin tuaj nuk është garanci se do të sëmureni nga mikrobet e saj.

“Në varësi të numrit të mikrobeve që mbante miza, sa kohë ishte në ushqimin tuaj dhe sa i fortë është sistemi juaj imunitar, ju nuk mund të infektoheni kurrë”, thotë Daniels.

Pra, nëse një mizë e vetme ka zbritur në ushqimin tuaj një herë dhe shtëpia juaj është e pastër, ndoshta është e sigurt të vazhdoni të hani.

Do të ishte një shqetësim më i madh nëse ndodheni në një mjedis plot me insekte, për shembull, në një piknik në natyrë. Në fund të fundit, sa më shumë miza të zbresin në vaktin tuaj, aq më shumë mikrobe mund të lënë pas.

“Mbulojeni ushqimin derisa jeni duke pritur për ta ngrënë”, këshillon doktori Larz, i cili sugjeron gjithashtu të përdorni një lecke ose një pjate tjetër për këtë qëllim.

Kurse në rastet që “shihni miza që gumëzhinin rreth ushqimit që keni lënë pa mbuluar për një kohë, do të ishte mirë ta hidhni nëse kujdeseni për shëndetin tuaj dhe të njerëzve tuaj të dashur”, këshillon Daniels.

/Albanianpost.com


Lajmet kryesore