Zyrtari administrativ në Agjencinë për Regjistrim Civil në Ministrinë e Punëve të Brendshme, me inicialet D.B, është arrestuar para dy ditësh në pikën e kalimit kufitar në Batrovc të Serbisë, pasi në veturën e tij Policia kufitare ka njoftuar se ka gjetur 18 kilogramë të substancës së dyshuar narkotike të llojit marihuanë.
Sipas njoftimit për media të autoriteteve serbe, D.B, i është caktuar fillimisht masa e ndalimit për 48 orë dhe brenda afatit ligjor, pritet që të merren edhe masa tjera ligjore ndaj tij.
Ndryshe, mediat në Prishtinë kanë raportuar se i dyshuari ishte arrestuar edhe gjatë vitit të kaluar.
Madje ndaj tij ishte ngritur aktakuzë, meqë dyshohet se i kishte dhënë disa dokumente në mënyrë joligjore për një person nga Shqipëria, i kërkuar nga INTERPOL-i për drogë.
Albanian Post ka dërguar pyetje edhe në adresë të MPB-së për ta konfirmuar arrestimin e të dyshuarit, por deri në publikimin e lajmit nuk ka marrë përgjigje.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
