Gjykata e Apelit ka refuzuar ankesat e mbrojtjes së dy të dyshuarve për spiunazh Bedri Shabani dhe Muharrem Qerimi, duke i lënë ata në paraburgim.

Ky vendim është marrë pasi që mbrojtësi i të akuzuarit Shabani, avokati Besnik Berisha kishte paraqitur ankesë në Gjykatën e Apelit, me pretendimin se aktvendimi i gjykatës së shkallës së parë është arbitrar dhe i kundërligjshëm.

Kurse sipas avokatit të Qerimit, Ridvan Kajtazi, në ankesë ishte pretenduar se vendimi i Themelores për caktimin e paraburgimit mbështetet vetëm në supozime dhe jo në fakte.

Sipas Apelit, fakt më të besueshëm arratisjen e këtyre të pandehurve e bën edhe fakti se të njëjtit kanë udhëtuar shpesh për në Serbi, Sarajevë, Maqedoni apo edhe vende të tjera ku njëri nga ta ka edhe familjarë, çka paraqet rrezik potencial që të njëjtit t’i ikin përgjegjësisë penale.

“Caktimi i paraburgimit është i domosdoshëm dhe i arsyeshëm në këtë fazë të procedurës penale sa i përket pengimit të arratisjes”, thuhet në vendimin e gjykatës.

Nga Apeli, vendimi i Themelore është vlerësuar si i drejtë pasi që hetimi për këtë çështje është në fazën fillestare të tij.

Sipas gjykatës, nëse të njëjtit lihen në liri mund të ndryshohen ose falsifikohen provat e veprave penale.

“E veçmas mund të ndikojnë tek njëri-tjetri meqenëse veprimet e tyre ndërlidhen tërthorazi mes vete duke qenë se kanë kontaktin e përbashkët me zyrtarin e BIA-së si dhe mund të ndikojnë në dëshmitarët e kësaj çështje penale e që policia është duke punuar në identifikimin e disa prej tyre, e disa prej tyre vetëm se janë identifikuar”.

Shabani dhe Qerimi, dyshohet se kanë kryer veprën penale “Spinuazhi”, ndërsa i pandehuri Qerimi dyshohet se ka kryer edhe veprën tjetër penale “Mbajtja në pronësi, kontroll ose posedim të paautorizuar të armëve”.

Dy shtetasit kosovarë u arrestuan pas një hetimi disamujor dhe ngarkohen me veprën penale “spiunazh”.

Në bazë të raportimeve të mediave vendore, personat e arrestuar dyshohet se kanë spiunuar për Agjencinë Serbe të Sigurisë dhe Informacionit (BIA).

Bedri Shabani, është edhe dëshmitar i Zyrës së Prokurorit të Specializuar në gjyqin ndaj Ushtrisë Çlirimtare të Kosovës.