Në Gjykatën Speciale, javën e ardhshme do të vazhdojnë dëshminë dy dëshmitarë.
Dëshmitari i parë fillimisht do të jetë njëri nga të cilët ka dëshmuar në seanca të mbyllura por që se ka përfunduar dëshminë akoma.
Kurse tjetri do të nis të hënën dëshminë.
Lajmin e ka bërë të ditur për Albanian Post zëdhënësi i Zyrës së Prokurorit të Specializuar (ZPS), Christopher Bennett.
“Dëshmitari i parë javën e ardhshme do të paraqitet vetëm shkurt për të përfunduar dëshminë. Është dëshmitari 4739 që dëshmoi në seancë me dyer të mbyllura. Dëshmitari tjetër, i cili ka të ngjarë të fillojë të dëshmojë të hënën në mëngjes, do të dëshmojë publikisht”.
Më 18 prill, Dhomat e Specializuara të Kosovës (DHSK) në Hagë të Holandës ua kanë vazhduar masën e paraburgimit ish-eprorëve të Ushtrisë Çlirimitare të Kosovës (UÇK) – Hashim Thaçi dhe Kadri Veseli – ndërsa trupi gjykues konstatoi se ekziston rreziku i pengimit të procesit gjyqësor.
Ish-presidenti i Kosovës, Hashim Thaçi, ish-kryeparlamentarët – Kadri Veseli e Jakup Krasniqi – dhe ish-deputetit kosovar, Rexhep Selimi, akuzohen për vrasje, torturë e trajtim mizor në rreth 40 qendra ndalimi në periudhën midis viteve 1998–1999.
Gjyqi ndaj ish-krerëve të UÇK-së nisi më 3 prill 2023, pas më shumë se dy vjet nga konfirmimi i aktakuzës.
Por, katër të akuzuarit e Speciales e kanë mohuar çdo pretendim të Prokurorisë.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
