Drejtuesi i Prokurorisë së Posaçme SPAK, Altin Dumani, ka pasqyruar përpara Komisionit të Ligjeve në Kuvendin e Shqipërisë punën e institucionit që ai drejton gjatë vitit të fundit, duke e cilësuar si një rritje pozitive performance.
Gjatë raportit, ai theksoi se për herë të parë, janë përdorur agjentë të infiltruar dhe për më tepër, është rritur edhe aksesi i SPAK në sistemet e të dhënave.
Çështjet e transferuara ndërkaq janë ulur dhe rëndësi e veçantë i është kushtuar procedimeve.
“Një e dhënë e rëndësishme është ajo e rritjes së gamës së databazave, ku SPAK ka akses të drejtpërdrejtë. Kjo është një arritje sepse ne e dimë se sa e dobishme është përshtatja në mënyrë të shpejtë. Po krijon një sistem të brendshëm të menaxhimit, për menaxhimin e informacionit në mënyrë sa më të shpejtë”, theksoi kryehetuesi.
Në tërësi kanë qenë katër vendime dënimi për ish-zyrtarë të nivelit të lartë, si edhe 24 procedime penale për këtë kategori.
Shqetësim megjithatë ka shfaqur sa i takon plotësimit të Byrosë Kombëtare të Hetimit, pasi ende ka vende vakante për tre prokurorë dhe 27 punonjës të administratës civile.
“Në lidhje me rekomandimin e përmbylljes së plotësimit të vendeve vakante në SPAk dua të them se gjatë vitit 2022 është përfunduar procesi i rekrutimit të 32 hetuesve të Byrosë Kombëtare të Hetimit, duke finalizuar në këtë mënyrë, plotësimin e kësaj strukture me emërimin e 60 hetuesve pranë BKH”, përmbylli Dumani në pasqyrimin e situatës.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
