“Dumani ka dëshmuar se presidenti Meta ka urdhëruar vrasjen e vëllait të një deputeti socialist”

Nuredin Dumani, i penduari i drejtësisë, ka dëshmuar se presidenti i Shqipërisë, Ilir Meta, ka porositur vrasjen e vëllait të një deputeti socialist.

Ka qenë kjo deklarata e gazetarit investigativ, Artan Hoxha, në një dalje televizive në emisionin Opinion.

Hoxha tha se kjo dëshmi duhet të verifikohet nga Prokuroria.

Ai shtoi se ngjarja ka ndodhur siç ka deklaruar Dumani, ndërsa deri më tani ende nuk ka një autor të arrestuar.

“Nuredin Dumani ka shkuar deri aty sa ka deklaruar se një nga tre personat më të fuqishëm sot nga politika, ka porositur vrasjen e vëllait të një deputeti”, tha Hoxha.

Sipas tij, Dumani ka ravijëzuar se kjo vrasje është porositur nga një politikan i rëndësishëm dhe është vrarë vëllai i një deputeti i PS.

“Këto gjëra duhen verifikuar. Dumani thotë se Ilir Meta ka porositur vrasjen e vëllait të një deputeti të PS. Nuredini thotë se personat që kanë lidhje me këtë ngjarje i njeh”.

Hoxha sjell si fakt vrasjen e Aleksandër Ndokës, vëllai i deputetit socialist, Arben Ndoka.

Autori i krimit ende nuk është arrestuar.

“Ai u vra në derën e shtëpisë. Ai ka folur dhe për politikanë të tjerë. Prokuroria duhet ta verifikojë”, përmbylli Hoxha.

Ndoka u vra në 2017-ën, pasi u qëllua me 14 plumba kallashnikovi.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.