Dreshaj, Latifit: Ministër kur don me ja nis punës?

Deputeti i Aleancës për Ardhmërinë e Kosovës, Shemsedin Dreshaj ka komentuar punën e ministrit të Shëndetësisë Rifat Latifit, duke thënë se nuk është vërejtur asnjë ndryshim pozitiv.

Dreshaj, përmes një shkrimi në rrjetin social ‘Facebook’, ka shkruar se pacientët kanë mbetur pa përkujdesje, ndërkaq mjekët dhe stafi shëndetësor po punojnë me paga shumë të ulëta.

“Shtatë muaj që nga marrja e detyrës si ministër, as në shërbimin terciar dhe sekondar nuk ka asnjë zhvillim më të voglin pozitiv. Sot, pacientët bredhin prej zyrës në zyre, pa asnjë përkujdesje dhe përgjegjësi institucionale ndërsa mjekët dhe stafi shëndetësor punojnë me paga shumë të ulëta”, ka shkruar Dreshaj.

Deputeti opozitar, tutje tha se ia ka përmendur Latifit të gjitha dështimet e tij.

“Ministrit i thashë: dështim në edukim, dështimin në menaxhim, dështim në sistem të pagesave dhe sigurimet shëndetësore dhe miqësisht e pyeta; ministër kur don me ja nis punës?”.

Sipas tij, Qendra Klinike Universitare e Kosovës është duke u përballur me probleme të mëdha.

“Lista esenciale e paraqitur sot në dokumentin që e ofroi ministri është e pa saktë. Letra duron gjithçka por e vërteta është që sot klinicistët, QKUK-ja ku punoj unë nuk i ka medikamentet e nevojshme. Kjo është e verifikueshme fare lehtë”.

Ndër të tjera, Dreshaj ka përmendur edhe largimin e mjekëve nga Kosova.

“Ministri duhet ta dijë që çdo ditë, mjekët dhe stafi shëndetësorë po e lëshojnë Kosovën. Ekziston rreziku real që vendi ynë në të ardhmen e afërt të mbes pa staf të mjaftueshëm shëndetësor”.

Tutje, ai ka pohuar se ministri Latifi do duhej të ishte me agresiv rreth Ligjit të Pagave, “pasi që deri më tani nuk është dëgjuar të flasë për këtë temë”.

Në konferencën e tij të parë si Ministër, Latifi i sapo emëruar i shëndetësisë, kishte premtuar se ai vetë dhe ekipi i tij do të angazhohen në ngritjen e standardeve mjekësore duke e ngritur edukimin dhe trajnimin e të gjithë punëtorëve shëndetësor.

Në vitin 2009, Latifi ishte emëruar këshilltar për shëndetësi nga kryeministri i atëhershëm, Hashim Thaçi.

Ai vjen nga Shtetet e Bashkuara të Amerikës ku suksesshëm zhvillon profesionin e tij prej mjeku. Megjithatë, prejse ka ardhur ka pasur kritika për të.

Mos-qëndrimi në kohë të plotë në Kosovë ka bërë shumë kë të pyes nëse ai është i dedikuar mjaftueshëm në punën e ministrit meqë ndanë jetën mes Kosovës e Amerikës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.