Drejtori i Agjencisë së Kosovës për Inteligjencë (AKI), Petrit Ajeti, është duke raportuar në Komisionin për Mbikëqyrjen e Agjencisë së Kosovës për Inteligjencë me dyer të mbyllura.
Mbledhja ka filluar në ora 09:00 dhe nuk dihet se sa do të zgjasë.
Kryetarja e komisionit parlamentar për siguri, Ganimete Musliu, kishte njoftuar se për shkak deklaratave të shumta të krerëve të shtetit për një situatë jostabile në vend është ftuar Ajeti për të raportuar në këtë komision.
“Njëri nga vendimet që mori sot Komisioni është që të mërkurën të ftohet drejtori i përgjithshëm i AKI-së dhe të njoftoj për gjendjen e sigurisë. Kjo për shkak se kemi dëgjuar deklarata të shumta të krerëve të shtetit për ndjeshmërinë e sigurisë në vend dhe rreziqet e mundshme”, ka thënë Musliu para gazetarëve të mërkurën e javës së kaluar.
Ajo ka sqaruar se gjatë mbledhjes kanë trajtuar raportin një vjeçar të AKI-së, ku ka raportuar kryeinspektori Kujtim Shala.
“Evidentuam shumë çështje të brendshme të AKI-së, për të cilat u dakorduam se në ditët në vazhdim t’i trajtojmë në mënyrë të detajuar. Në raportet të cilat prezantohen zakonisht kemi të bëjmë me shifra teknike dhe jo shpesh herë i shohim këto detaje, por si komision e kemi të drejtën të kemi qasje në dokumente dhe të shohim të gjitha veprimet që janë marrë nga inspektorati”.
Të gjithë krerët e shtetit së fundmi kanë paralajmëruar për një situatë jo të mirë të sigurisë në Kosovë.
Së fundmi ishte kryeministri i Kosovës, Albin Kurti, i cili gjatë një interviste për prestigjiozen amerikane, CNN, ka potencuar se “Serbia është shumë agresivë ndaj Kosovës”.
“Fillimisht duke mos e njohur si shtet të pavarur, krahas kësaj është e angazhuar në luftë hibride dhe bën stërvitje ushtarake në kufi”, i tha ai gazetares britaniko-iraniane, Christiane Amanpour.
Duke nënvizuar faktin se Serbia ka 48 baza operative përgjatë kufirit me Kosovën, Kurti potencoi se Beogradi është “në pritje të një dritareje të re të mundësive”.
Ndërsa, ministri i Mbrojtjes së Kosovës, Ejup Maqedonci, në një intervistë për Albanian Post ka deklaruar se Forca e Sigurisë së Kosovës në vazhdimësi përgatitet dhe trajnohen në rast të ndonjë sulmi nga jashtë, eventualisht nga grupe që financohen nga Serbia.
Edhe ministrja e Punëve të Jashtme, Donika Gërvalla, më 8 korrik ka deklaruar se do të shpërthejë një luftë e gjithanshme në rajon.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
