Dreçun: Gjykata Speciale po gjykon UÇK-në, jo individët

Ndërsa seanca gjyqësore ndaj ish-krerëve të Ushtrisë Çlirimtare të Kosovës, Hashim Thaçit, Kadri Veselit, Rexhep Selimit dhe Jakup Krasniqit në Dhomat e Specializuara në Hagë po vazhdon, të martën, me deklarimin e ekipeve mbrojtëse, i ashtuquajturi kryetari komisionit për Kosovën në Kuvendin e Serbisë, Milovan Dreçun, ka thënë se gjykimi në Speciale ndaj Thaçit dhe të tjerëve është gjykim i UÇK-së, jo i individëve, siç kanë deklaruar ambasadorët shteteve të QUINT-it të hënën kur edhe nisi gjykimi ndaj tyre.

Sipas tij, në aktakuzë thuhet se Thaçi dhe të tjerët kanë qenë pjesë e një ndërmarrjeje të përbashkët kriminale.

“Sado që në Kosovë përpiqen të tregojnë se ky nuk është gjykimi i UÇK-së, por të individëve e kanë gabim. Jam absolutisht i sigurt se do të vërtetohet, se janë kryer krime”, ka pretenduar Dreçun, i cili një ditë më parë ka dhënë një kontribut të rëndësishëm për të dokumentuar se “UÇK ishte një ndërmarrje kriminale e organizuar dhe me një strukturë hierarkike”.

Dreçun madje ishte shprehur i lumtur që Specialja kishte hartuar aktakuzën siç kishte sugjeruar Serbia.

“Pala serbe i ka dhënë prokurorisë materiale të kapura nga forcat tona gjatë konfliktit me pjesëtarët e UÇK-së, të cilat mundësojnë t’i dëshmojnë organizimin hierarkik”.

Abbott: Në Hagë nuk po gjykohet lufta e UÇK-së

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.