Draft-koncepti për konfiskimin e pasurisë së pajustifikueshme nga Ministria e Drejtësisë së Kosovës, i proceduar për Qeveri, sipas hulumtuesit në Institutin e Kosovës për Drejtësi, Gzim Shala, nuk zgjidhë kurrfarë problemi, pos që “rrezikon sigurinë juridike të qytetarëve”.
Shala, në një intervistë për Albanian Post, deklaron se për më tepër, ky ligj “mund të përdoret për qëllime të caktuara politike”.
“Kjo është thënë edhe në raporte të ndryshme ndërkombëtare. Për këtë arsye, sikurse edhe para rreth një (1) viti, IKD i rekomandon Qeverisë së Republikës së Kosovës që mos të procedojë me këtë sistem të konfiskimit, por të fokusohet që brenda kompetencave që ka, të ndërtojë politika që ngrisin zbatimin e dispozitave ligjore të cilat tanimë janë në fuqi”.
Sipas Shalës, Kosova vazhdimisht ka pasur mjaftueshëm dispozita ligjore që ndikojnë në ngritjen e efikasitetit të sistemit të drejtësisë në drejtim të luftimit të kriminalitetit përmes konfiskimit të pasurisë së kundërligjshme.
“Ajo që ka munguar deri më tani, ka qenë mungesa e vullnetit politik për tu angazhuar në këtë fushë”, tha Shala.
Ndryshe nga Shala, draft-konceptin për konfiskimin e pasurisë së pajustifikueshme, po e mirëpret njohësi i çështjeve të drejtësisë Anton Nrecaj.
Ai tha për Albanian Post se “me aq sa kam vërejt është indikacioni kryesor të behën ndryshime legjislative, respektivisht hartimin e një ligji të ri, ligjit të ri për konfiskimin e pasurisë së fituar në mënyrë të pajustifikueshme, gjë për të cilën edhe unë personalisht jam gjithmonë dakord”.
“Por që ky ligj të evitoj konfliktet ligjore që mund të dalin në fazën e zbatimit të ligjit në harmoni me kornizën ligjore aktuale të cilën thënë sinqerisht është shumë e mirë, por që gjithmonë ka munguar vullneti për t’i zbatuar ligjet”, tha Nrecaj.
Ai thotë se “kam drojën dhe rezervat e mia se do të krijomë prapë një situate të re të praktikes se vjetër dhe shumë të keqe që të kemi ligje shumë te mira në harmoni me standarde të larta të vendeve të Bashkimit Evropian, por me një përvojë shumë te keqe me mos zbatueshmerisë së këtyre ligjeve në praktikë.
“Ditëve në vijim presim që të kemi ne prezantim me ne detaje të këtij dokumenti dhe të shohim se cilat janë qëllimet dhe pritshmëritë e këtij dokumenti”, shtoi ai.
Koncept-dokumenti parasheh që hetimi për pasurinë e fituar në mënyrë të paligjshme, e cila nuk mund të justifikohet, të bëhet për 21 vjetët e fundit.
Një kopje të këtij koncept dokumentit për çështjen e pasurisë së fituar në mënyrë të pajustifikueshme e ka siguruar Albanian Post.
Në këtë dokument parmendën pesë fazat e procesit të konfiskimit ashtu siç janë të përcaktuara në Dokumentin e Punës të Komisionit Evropian të vitit 2012.
/Albanianpost.com
