“Doza e tretë e vaksinës AstraZeneca ndihmon në luftën me variantin Omicron”

Kompania farmaceutike e prodhimit të barnave, AstraZeneca, ka njoftuar se vaksina e saj COVID-19, Vaxzevria, gjeneroi një rritje të antitrupave kundër Omicron dhe varianteve të tjera kur jepej si një dozë e tretë përforcuese.

“Përgjigjja e shtuar, gjithashtu kundër variantit Delta, u pa në një analizë gjaku të njerëzve që ishin vaksinuar më parë ose me Vaxzevria, ose një vaksinë mRNA”, tha fillimisht prodhuesi i barnave.

Më tej, ai bëri me dije se përfundimet e të dhënave paraprake do t’i dorëzonte te rregullatorët në mbarë botën, nisur ka nevoja urgjente për një përforcues.

AstraZeneca e ka zhvilluar vaksinën me studiues nga Universiteti i Oxford-it.

Studimet laboratorike të kryera nga universiteti muajin e kaluar kanë gjetur tashmë se një kurs me tri doza të Vaxzevria-s ka rritur nivelet e antitrupave në gjak kundër variantit Omicron, i cili përhapet me shpejtësi.

Deklarata e shkurtër, e cila nuk përfshinte të dhëna specifike, ishte e para nga AstraZeneca mbi potencialin mbrojtës të Vaxzevria si një injeksion përforcues.

Kompania tha se gjetjet “shtojnë në numrin në rritje të provave që mbështesin Vaxzevria si një përforcues i dozës së tretë, pavarësisht nga skemat e vaksinimit parësor të testuar”.

Të dhënat mbi potencialin e Vaxzevria si një përforcues erdhën nga një analizë krahasuese në një provë që testonte një vaksinë të ridizajnuar e cila përdor teknologjinë vektoriale pas Vaxzevria, por që synon variantin Beta tashmë të zëvendësuar.

AstraZeneca po përpiqet të tregojë se vaksina specifike Beta ka potencial edhe kundër varianteve të tjera dhe më shumë të dhëna provë priten gjatë gjysmës së parë të vitit.

Universiteti i Oksfordit dhe AstraZeneca muajin e kaluar filluan punën për një vaksinë që synon  luftimin posaçërisht të Omicron, megjithëse Astra – si dhe prodhues të tjerë vaksinash në projekte të ngjashme zhvillimi – kanë thënë se nuk ishte ende e qartë nëse një përmirësim i tillë ishte i nevojshëm.

Një provë e madhe britanike në dhjetor zbuloi se injeksioni i AstraZeneca rriti antitrupat kur jepej si një përforcues pas vaksinimit fillestar me vaksinën e tij ose Pfizer, por kjo ishte përpara përhapjes shpërthyese të variantit Omicron.

Sidoqoftë, studimi në atë kohë arriti në përfundimin se vaksinat mRNA të bëra nga Pfizer dhe Moderna dhanë një nxitje më të madhe ndaj antitrupave kur jepeshin si dozë e tretë.

AstraZeneca dhe partnerët e saj të prodhimit me kontratë kanë furnizuar globalisht mbi 2.5 miliardë doza të vaksinës së saj, edhe pse ajo nuk është e aprovuar në Shtetet e Bashkuara, ndërsa BioNTech-Pfizer ka dërguar rreth 2.6 miliardë doza.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.