Dortmundi dhe PSG të jashtëzakonshëm, përmbysin rezultatet dhe kualifikohen në gjysmëfinale

Dolën të dyja nga grupi i ferrit dhe të dyja do ta rishohin njëra-tjetrën në gjysmëfinale.

Borussia e Dortmundit dhe Paris Saint Germain kanë zhvilluar dy ndeshje të jashtëzakonshme përballë spanjolleve Atletico Madrid dhe Barcelona, duke përmbysur rezultatet e ndeshjeve të para dhe duke u kualifikuar mes katër më të mirave të kontinentit.

Dortmundi, pavarësisht një skepticizmi të lartë nga të gjithë përballë Atleticos, e pa veten superiore në çdo element të lojës dhe vetëm sa i ndërlikoi jetën vetes për të arritur një kualifikim për në gjysmëfinale.

Me një vendosje të përkryer në fushë nga tekniku Edin Terzic, verdhezinjtë arritën të fitojnë 4 me 2 në një Signal Iduna Park të frikshëm.

Në minutën e 34’ ishte Julian Brandt, ai i cili e kaloi ekipin në avantazh pas një asistimi nga Mats Hummels. Pesë minuta më vonë, Sabitzer serviri Ian Matsen me një gjuajtje të pastër në portë dhe 2 me 0 për Dortmundin mbyllet pjesa e parë.

Hummels, protagonist në të keq me fillimin e pjesës së dytë, i jep Atleticos një autogol të rëndësishëm që i kthen në lojë dhe i jep shpresë. Duke ushtruar presion, madrilenët gjejnë edhe rrugën e barazimit me Correa dhe janë ata në gjysmëfinale në këtë pikë.

Por Dortmundi sot ishte i pathyeshëm dhe u rikthye shpejt në shina.

Sabitzer sërish për Fullkrug dhe 3 me 2. Nuk ka kohë shtesë megjithatë, sepse Sabitzer, i rikthyer së fundmi pas një dëmtimi, e ka vendosur që dortmundasit t’i çojë në qiell, duke realizuar një gol të katërt dhe duke i dhënë kualifikimin e artë.

Tjetër histori është ajo në katalonjë.

Barça dominon pjesën e parë të lojës dhe merr avantazhin në minutën e 12-ë me Raphina, pas një asistimi nga Lamine Yamal.

Minuta e 30’ vendos gjithçka, jo me gol, por me një të kuq direkt për Araujo.

PSG është e vetme në fushë dhe në ofensivë të plotë pas kësaj.

Në minutën e 40’ shënon Dembele. Pjesa e dytë fillon qetë, derisa në të 54-ën minutë realizon Vitinha. PSG flirton me kualifikimin.

E vulos atë ylli i ekipit, Kylian Mbappe, një herë nga pika e bardhë e penalltisë dhe më pas në të 89-ën, për të vulosur një rezultat 1 me 4 dhe për të marrë një kualifikim të merituar.

Tashmë do të kemi një duel të përsëritur në gjysmëfinale.

Do t’ia dalë Dortmundi të kthehet pas në kohë me mbi 10 vjet dhe të përjetojë një tjetër finale Championsi? Apo PSG do t’i ketë përvetësuar gabimet nga faza e grupeve dhe nuk do t’i lejojë gjermanët t’i shkelin sërish.

I premtuar është vetëm një spektakël i vërtetë, i cili nuk duhet të mungojë në këtë ndeshje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.