Mandatari për formimin e Qeverisë së re të Maqedonisë së Veriut, Hristjan Mickoski, ka dorëzuar në Kuvend përbërjen e ekzekutivit që do të udhëhiqet nga ai.
Lajmi u bë i ditur nga vetë Mickoski, përmes një postimi në Facebook.
“Sot në Kuvend kam dorëzuar Propozimin për programin e punës së Qeverisë së ardhshme të udhëhequr nga VMRO-DPMNE si mandatar, po ashtu bashkë me Programin e punës së Qeverisë së ardhshme është dorëzuar edhe lista e anëtarëve të Qeverisë së ardhshme. Si pjesë shoqëruese e asaj liste janë biografitë e tyre”, shkroi Micksoki.
Lideri i VMRO-DPMNE-së theksoi se qytetarët presin rezultate të shpejta.
“Është e qartë se kjo Qeveri dhe pritshmëritë e qytetarëve janë të realizojë atë që ka premtuar”, përfundoi.
Pas kësaj, pritet që shumë shpejt të caktohet seanca për votimin e qeverisë së re maqedonase.
Siç raportojnë mediat në Shkup, seancën parlamentare për zgjedhjen e ekzekutivit të ri, Kryetari i Kuvendit, Afrim Gashi, pritet ta caktojë për të shtunën në ora 11:00.
Numrin më të madh të resorëve qeveritare në ekzekutivin që do të drejtohet nga Mickski, do ta ketë VMRO-DPMNE-ja, 15 sosh, tre prej tyre do të jenë zëvendëskryeministra.
Ndërsa, shqiptarët, që në këtë qeveri përfaqësohen nga koalicioni “VLEN”, do të drejtojnë 5 ministri, dhe një pozitë të zëvendëskryeministrit.
Pjesë e qeverisë është edhe Lëvizja “ZNAM”. 2 është numri i ministrive që do të jenë nën udhëheqjen e kësaj lëvizje.
Përveç këtyre, pjesë e qeverisë së Mickoski-t do të jetë edhe Kryetari i Partisë Demokratike të Serbëve në Maqedoninë e Veriut, Ivan Stoilkoviç, i cili mohon gjenocidin në Srebrenicë dhe ka qëndrime anti-shqiptare, madje kishte thurur lavde për terroristët serbë të vrarë në Banjë të Zveçanit.