Dorëzohen në selinë blu 4200 firmat e nismës ‘Berisha’

Janë dorëzuar të mërkurën e 10 nëntorit firmat e mbledhura nga ish-kryeministri i Shqipërisë, Sali Berisha, me qëllim rrëzimin e vendimit të përjashtimit të tij nga Grupi Parlamentar demokrat.

Formularët janë depozituar në selinë e Partisë Demokratike te kryetari i Këshillit Kombëtar i PD-së, Edi Paloka.

Vetë Berisha nuk ishte i pranishëm në momentin e dorëzimit, por ishin deputetët përkrahës të tij, Flamur Noka, Edmond Spaho, Aldo Bumçi, Klevis Balliu, Albana Vokshi dhe të tjerë.

Paloka, në deklaratën për mediat tha se do të zbatojë detyrimin e delegatëve, ndërsa zbuloi se ai vetë nuk ka firmosur.

“Firmëtarët më kanë kërkuar që të ruhet fshehtësia e të dhënave të tyre, formularët do të hapen vetëm ditën e Kuvendit të jashtëzakonshëm”, bëri me dije ai.

Më herët, Berisha në konferencën e mbajtur pas mbledhjes së 4 mijë e 200 firmave për thirrjen e Kuvendit Kombëtar të demokratëve u shpreh se ky është një moment historik.

Kuvendi, njoftoi ish-kryeministri, do të mbahet më 11 dhjetor, në simbol të themelimit të PD-së.

Sipas tij, PD-ja më 12 dhjetor do të gdhijë e rithemeluar.

Nga ana tjetër, Lulzim Basha ka deklaruar se nuk do të ketë asnjë Kuvend antiamerikan, duke iu referuar vendimit të DASH-it për shpalljen e Berishës persona non grata.

Ai siguroi se do të ruhet privatësia e të gjithë personave që kanë firmosur.

I pyetur për deklaratën e ambasadores amerikane, Yuri Kim, se SHBA-të nuk do ta mbështesin PD-në nëse ai kthehet në krye – Berisha theksoi se “ nëse ambasadorja ka një provë kundër meje, t’i çojë pranë Gjykatës në Paris”.

“Foltorja nuk ka ngjallur vetëm shpresën e shqiptarëve, por se ka marrë mbështetje të madhe edhe në Evropë dhe SHBA”, tha ish-kryeministri.

Sërish nuk mungoi ftesa e tij për debat me kryeministrin e Shqipërisë, Edi Rama.

Ai deklaroi se me ardhjen e tij në krye të PD-së, pas Kuvendit, nuk do ta përjashtojë Lulzim Bashën.

“Lulzim Basha me gjithë dëmin e tmerrshëm që i ka bërë PD-së, megjithëse është peng për faj të vetin, përsëri unë mendoj do të jetë vetë ai që do të përcaktojë vendin e tij, demokratët do të flasin me votë për Lulzim Bashën”, tha Berisha.

Me nisjen e takimit, ai bëri të ditur se Floriana Garo do të jetë drejtoresha e Komunikimit të kësaj nisme.

Më 9 nëntor, Berisha deklaroi se ky është një numër i mjaftueshëm për të mbledhur delegatët.

Sipas Berishës, ky vendim do të sjellë rikthimin e Partisë Demokratike drejt fitoreve.

Vendimi i drejtuesit aktual të demokratëve, Lulzim Basha, për të përjashtuar Berishën, erdhi më datë 9 shtator, një ditë përpara fillimit të legjislaturës së re të Parlamentit.

Arsyetimi ishte shpallja e Berishës non grata nga Departamenti Amerikan i Shtetit.

Ky i fundit nisi menjëherë një aksion ndaj vendimit të Bashës për ta përjashtuar. Një seri foltoresh u ngjizën nga Berisha për të mbledhur firmat për thirrjen e Kuvendit Kombëtar.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.