Djali i Joe Biden, financues i laboratorëve për armë biologjike në Ukrainë?

Sipas Moskës, ai mund të jetë i përfshirë dhe për vërtetësinë e gjithë hamendësimeve, do të kërkohen sqarime.

Bëhet fjalë – as më pak e as më shumë – për djalin e kreut të Shtëpisë së Bardhë, Hunter Biden, i cili sipas zëdhënësit për shtyp të Kremlinit, Dmytri Peskov, mundet të jetë i përfshirë në laboratorë zhvillues të armëve biologjike në Ukrainë, nën petkun e financuesit të tyre.

“Do të kërkojmë shpjegime”, tha Peskov gjatë një konference për shtyp, kur u pyet nga gazetarët. “Nuk jemi ne të vetmit, të cilët i kemi këto dyshime. Edhe Kina, ka kërkuar të jepen detaje sqaruese mbi këto dyshime”.

Hunter Biden është edhe pjesë e listës së sanksioneve ruse, si pjesë e hakmarrjes moskovite ndaj masave ndëshkuese perëndimore të pas-agresionit.

Sipas disa dokumenteve të pretenduara nga pala ruse, janë investimet nga një fond i grupit investues Rosemont Seneca Partners, i cili në krye të presidencës sheh pikërisht Hunter Biden.

Është pikërisht ky grup, i cili mendohet se sponsorizon laboratorë për krijimin e armëve biologjike. I përfshirë madje sipas rusëve, është edhe fondacioni i George Soros.

Pra, dyshimet janë të përfshira në shumë drejtime, por ende pritet të vërtetohet ndonjë prej tyre.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.