Disney do të shkurtojë 7 mijë vende pune pas rënies së abonentëve

Bob Iger, shefi ekzekutiv i Disney-it, ka thënë se do të shkurtojë shtatë mijë vende pune.

Lëvizja është pjesë e një plani për të kursyer 5.5 miliardë dollarë dhe për ta bërë shërbimin e tij të transmetimit Disney+ fitimprurës.

Kjo pasi ky i fundit ka raportuar rënien e parë të abonentëve që kur filloi shërbimin në vitin 2019.

Megjithatë, Iger ka treguar se nuk ka qenë e lehtë ta ndërmerrte këtë hap.

“Kam respekt dhe vlerësim të jashtëzakonshëm për talentin dhe përkushtimin e punonjësve tanë në mbarë botën, dhe jam i ndërgjegjshëm për ndikimin e këtyre ndryshimeve”, ka thënë ai.

Po ashtu ka shtuar se ndryshimet do të bëjnë që gjiganti argëtues të pozicionohet më mirë për të përballuar përçarjet e ardhshme dhe sfidat ekonomike globale.

Sakaq, shkurtimet e vendeve të punës arrijnë në rreth 3.6 për qind të fuqisë punëtore të Disney-t në mbarë botën.

Por Disney+ ka raportuar një humbje prej 1.5 miliardë dollarësh dhe abonentët e saj ranë me rreth 2.4 milionë në 161.8 milionë.

Ndërkohë, plani do të shohë ristrukturimin e kompanisë në tre segmente. Argëtimin që do të përfshijë filmin, televizionin dhe transmetimin; parqet, përvojat dhe produktet e ESPN dhe Disney me fokus sportin.

“Ky riorganizim do të rezultojë në një qasje më ekonomike dhe më të koordinuar për operacionet tona”, ka theksuar Iger.

Këto ndryshime të Disney-t adresojnë disa nga kritikat e ngritura muajt e fundit nga investitori aktivist miliarder Nelson Peltz, i cili kritikoi kompaninë për shpenzimet e tepërta në biznesin e transmetimit.

Në përgjigje të njoftimit, grupi Trian i Peltz ka thënë se është i kënaqur nga kjo lëvizje.

Iger bëri një rikthim tronditës si shefi ekzekutiv i Disney, më pak se një vit pasi u tërhoq nga firma.

Ai u kthye për të drejtuar kompaninë në kohë të trazuara pasi çmimi i aksionit të saj ra me shpejtësi dhe Disney+ vazhdoi të kishte humbje.

Iger, i cili më parë kishte drejtuar Disney-n për 15 vjet, zëvendësoi Bob Chapek, i cili mori postin e shefit ekzekutiv në shkurt 2020.

Por Chapek u rrëzua pasi biznesi i transmetimit të Disney-t postoi një humbje tremujore prej 1.5 miliardë dollarësh.

Më pak se 24 orë pas kthimit të tij në Disney, Iger ka treguar se po planifikonte një ndryshim të madh të biznesit.

Asokohe, ai ka thënë se kishte ngarkuar një grup drejtuesish për të hartuar “një strukturë të re që kthen më shumë vendimmarrje në duart e ekipeve krijuese dhe racionalizon kostot”.

Marrë nga “BBC”, përshtatur për “Albanian Post”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.