Dion Berisha ‘mollë sherri’ mes Shqipërisë dhe Kosovës

Pas çështjeve të Mirlind Dakut dhe Arbnor Mujës, duket se konflikti i radhës mes Federatës Shqiptare të Futbollit (FSHF) dhe asaj të Kosovës (FFK) është Dion Berisha.

Ditën e mërkure, 4 tetor, Alban Bushi, në rolin e trajnerit të Shqipërisë U-21 publikoi listën e lojtarëve të ftuar për ndeshjet kualifikuese të Euro 2025 ndaj Finalndës dhe Malit të Zi.

Lista e Bushit kishte disa risi me emra si Brajan Lenja, Bryan Boci, Eniss Shabani dhe Dion Berisha. Dhe, ky i fundit është “molla e re e sherrit” mes FSHF-së dhe FFK-së.

20-vjeçari Berisha, pjesë e ekipit të dytë të Bayern Munich, ka qenë pjesë e përfaqësueses së Kosovës në grupmoshat U-21 para se të merrte thirrjen nga Bushi. Gjithashtu më herët ai ishte aktivizuar me U-16 dhe U-17 dardane.

Me U-21 e Kosovës, Berisha është aktivizuar në dy ndeshjet e fundit kualifikuese për Euro 2025. Ai luajti 24 minuta në humbjen 3-0 ndaj Polonisë dhe 10 minuta në humbjen 3-0 ndaj Gjermanisë.

Anësori i djathtë mori ftesën e parë nga Kosova U-21 në vitin 2021 dhe debutoi teksa ishte në moshën 17 vjeç, 10 muaj e 17 ditë. Por, ai grumbulloi vetëm tre paraqitje për ta në 2021, para se të lihej në hije për një kohë të gjatë dhe të rithirrej në shtator të këtij viti.

Në sezonin aktual me Bayern II, Dioni ka realizuar pesë gola dhe dy asistime në 12 paraqitje në Regionalliga Bayern. Liga është kryesorja në rajonin e Bavarisë dhe e katërta për nga niveli në sistemin e futbollit gjerman.

Vendimi i Berishës, siç e përmendëm edhe më sipër, ka shkaktuar “furtunë” në Kosovë, pasi bëhet ylli më i fundit që i braktis për të përfaqësuar Shqipërinë.

Kujtojmë se për rastin e Dakut dhe Mujës, përplasja mes FSHF-së dhe FFK-së u bë e qartë, aq sa përfaqësues të federatës dardane deklaruan hapur “punën e pisët” të shoqatës së drejtuar nga Armand Duka.

Pak me shumë se tre javë më parë, menaxheri i Kombëtares së Kosovës, Bajram Shala tha në një intervistë se marrja e lojtarëve dardan nga Shqipëria “është stërtepruar”.

“Ne i kemi kuptuar kur FSHF-ja i është ofruar lojtarëve me prejardhje nga Kosova dhe iu ka ofruar shansin të luajnë për Shqipërinë, por të merren futbollistë që kanë luajtur për Kosovën në miqësore, kjo është përtej reprocitetit dhe bashkëpunimit të dy federatave. Kjo është përtej frymës sportive. Shqipëria i afroi (Dakun dhe Mujën) duke punuar prapa shpinës sonë”, tha Shala për “Top News” asokohe.

Megjithatë, në një përgjigje për Shalën dhe gjithë aktorët e futbollit në Kosovë që sulmuan FSHF-së për këtë çështje, kreu i saj Duka tha se “Kombëtarja shqiptare do jetë e hapur për çdo shqiptar që dëshiron të luajë për Shqipërinë, qoftë i lindur në Tiranë, Shkup, në Prishtinë” dhe se “më shumë ka qenë një dëshirë e futbollistëve sesa një kërkesë e jona”.

Dhe rasti i Berishës tregon edhe një herë se dera e Kombëtares kuqezi është e hapur për këdo shqiptar që dëshiron të përfaqesojë ngjyrat shqiptare, pavarësisht se ku është aktivizuar më herët.

20-vjeçari i lindur në Lyon shihet si një nga talentet e mëdhenj të futbollit në Kosovë, ndaj dhe kalimi i tij te Shqipëria ka shkaktuar një tjetër stuhi.

Edhe tifozët e përfaqësueses së Kosovës kanë reaguar mbi këtë ngjarje, duke qenë të ndarë në mendimet e tyre. Shumë tifozë kanë uruar Berishën për kalimin te Shqipëria, ndërsa dhe shumë të tjerë kanë reaguar keq.

“Të lumtë, ti shqiptar je”, shkruante një tifoz në mediat sociale.

“Vetëm të mos shkojë në Zvicër, Gjermani, Maqedoni (e Veriut) etj. Shqipërinë ose Kosovën, dy zgjedhje janë që duhen bërë”, shkruante një tjetër.

“Ska faj ky (Berisha) se strategët e U-21 e fusnin 10 minutat e fundit lojtarin më në top formë, ndërsa standard lojtarët e tyre”, reagoi i inatosur një tjetër tifoz.

Sigurisht që nuk munguan cilësimet “tradhëtar”.

Gjithashtu ka pasur edhe tifozë që kalimin e lojtarëve nga Kosova te Shqipëria e shohin si një përgjumje nga ana e organit të drejtuar nga Agim Ademi.

“Suksese Shqipërisë dhe FSHF, ata po punojnë e nuk po flen. FFK perderisa udhëhiqet nga njeriu që lehtë shantazhohet (Agim Ademi) nuk mund të ketë përparim”, shkruante në Facebook një prej tifozëve të përfaqësues së Kosovës.

“Sukese, kjo ndodh nga mos puna e FFK-së. Lista e njëjtë në ekipin e parë të Kosovës. Nuk u jepet mundësia talenteve. Ende me Ujkanin, Alitin dhe Valon Berishen. Duhet të iki Agim Ademi dhe Bajram Shala, pastaj do të ketë zhvillime te Kosova A dhe U-21”, shprehej një tjetër.

Dhe, në fakt, listat e kombëtares së Kosovës shpeshherë kanë qenë në qendër të kritikave nga analistët e futbollit në vend, për shkak të afrimit të lojtarëve në bazë të emrave dhe jo meritës.

Shumë lojtarë që nuk marrin minuta, apo nuk kanë marrë prej kohësh, me ekipet e tyre ftohen në kombëtare duke lënë mënjanë lojtarë të cilët po shkëlqejnë me skuadrat e tyre, pavarësisht se aktivizohen në liga më të vogla.

Legjenda e portës së Kosovës dhe ish-lojtari i Shqipërisë, Samir Ujkani ftohet ende në kombëtare. Në pesë sezonet e fundit, ai është aktivizuar në më pak se 10 ndeshje me ekipet e tij (Empoli, Torino, Rizespor). Ndërkohë, 35-vjeçari gjatë kësaj periudhe, përveç ftesës, është paraqitur në disa ndeshje me dardanët, në kualifikuese për Euro dhe Kupën e Botës, në Nations League dhe në miqësore.

Në krahun tjetër, Visar Bekaj, i cili para se të transferohej në Turqi këtë verë bëri paraqitje të shkëlqyera me Tiranën në Abissnet Superiore, gjatë kesaj kohe mori vetëm katër paraqitje me fanellën e kaltër, të cilat erdhën të gjitha në ndeshje miqësore. Dhe ky është vetëm një nga disa rastet që Kosova ka dëshmuar se ka vepruar në drejtimin e gabuar.

Rasti i Dakut dhe Mujës ishte ai më i bujshmi dhe që shkaktoi zhurmën më të madhe. Berisha është i radhës. Por, nëse nuk do të ketë ndryshime në mëndësi dhe veprime, atëherë duhet vetëm të presim, sepse do të jetë çështje kohe, kur të tjerë lojtarë do të lënë Kosovën. Dhe, mbase jo vetëm për Shqipërinë, por edhe për ndonjë kombëtare tjetër fiqnje apo dhe më larg.

Në fakt, jo vetëm Berisha, por Kosova së fundmi ka humbur edhe një “gladiator” si Edvin Kuç. Kapiteni i skuadrës së Ballkanit, një prej lojtarëve më të dalluar të Superligës, pas pritjes së gjatë të një ftese nga dardanët më në fund është dorëzuar dhe ka vendosur të përfaqësojë Malin e Zi.

Kuç, i cili ka shkruar historinë në futbollin kosovar me Ballkanin, duke u kualifikuar në dy sezone radhazi në grupet e UEFA Europa Conference League nuk mori asnjë ftesë nga Kosova, as për ndeshje miqësore, por vetëm fjalë.

Dhe, tani ai do të veshë fanellën e Malit te Zi, vendit ku ka lindur. Shqiptari, nga ana e nënës, i lindur në Rozhajë, do të luajë për Malin e Zi në miqësoren ndaj Libanit dhe ndeshjen kualifikuese ndaj Serbisë për Euro 2024, me dy ndeshjet që zhvillohen pas pak ditësh.

Kuç është një humbje aktuale për Kosovën, ndërsa Berisha është një humbje për të ardhmen. Ndaj, gjërat duhet të ndryshojnë në FFK, sepse gjithmonë e më shumë po shohim humbje, të cilat përveçse janë shpeshtuar në fushë (rezultatet negative), janë shpeshtuar edhe në radhët e lojtarëve.

Shqipëria është një shembull se si sistemet e kombëtares mund të funksionojnë dhe tërheqin lojtarët, pavarësisht se nuk është ai shembulli perfekt. Por, ka diçka pozitive dhe kjo po reflektohet edhe në rezultate (vendi i parë në grupin e kualifikueseve të Euro 2024, dhe vendi i parë në kualifikueset e U-21 për Euro 2025).

Prandaj ka ardhur koha që FFK-ja të reagojë, të punojë dhe të mos merret me akuza ndaj FSHF-së për “grabitjen” e lojtarëve. Nëse nuk ndryshon mënyra e punës, eksodi i lojtarëve të rinj nga dardanët mund të jetë vetëm në fillimin e tij.

Koha kur Kosova cilësohej si “Brazili i Ballkanit” ka përfunduar, por jo përgjithmonë. Ajo kohë mund të rikthehet. Duhet të rikthehet. Por, nuk mund të rikthehet po nuk u punua me objektiva dhe synime të qarta.

Federata e Futbollit të Kosovës duhet të reagojë në zyra, në mënyrë që ajo të reflektohet në fushë. Kurrë nuk është vonë për të vepruar. Gabimet mund të përdoren për të mësuar për të ardhmen.

Përsa i përketë debutimit të Berishës me Shqipërinë U-21, “Shpresat” luajnë më 13 tetor duelin e tretë në Grupin E ndaj Finlandës (ora 17:00, Veritas Stadion, Turku), ndërsa më 17 tetor do të presë Malin e Zi me takimin që luhet në stadiumin “Arena Egnatia”, duke filluar nga ora 14:30.

Shqipëria është shortuar në Grupin E bashkë me Rumaninë, Zvicrën, Finlandën, Malin e Zi dhe Armeninë, teksa renditet në vendin e parë pas dy fitoreve ndaj Armenisë U-21 dhe Rumanisë U-21.

Objektivi kryesor i kuqezinjve është kualifikimi për herë të parë në finalet e një Evropiani për këtë grup-moshë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.