Dilema e madhe e Kroacisë: A do të luajnë ‘të paprekshmit’ kundër Shqipërisë?

Kë do të lërë Zlatko Dalic në stol kundër Shqipërisë të mërkurën? A është koha për të ndarë pjesën më të njohur, mesfushën, që shpesh është shpallur më e mira në botë? A është dobësuar pak zemra e kombëtares kroate dhe po kërkon më shumë kohë për të pushuar?

Këto janë disa pyetje që po ngrihen nga mediat kroate për kombëtaren e tyre në prag të ndeshjes me Shqipërinë, por edhe pas asaj performance të dobët ndaj Spanjës ku morën një humbje 3-0.

Luka Modric (38 vjeç e 9 muaj), Marcelo Brozovic (31 vjeç e 7 muaj) dhe Mateo Kovacic (30 vjeç e 1 muaj) janë 100 vjeç së bashku.

Modric ka 176 paraqitje me fanellën e “Vatreni”-t, Kovacic 102 dhe Brozovic 97. Në total, ata kanë 375 paraqitje të pabesueshme për Kroacinë. Do të ishim dakord që për momentin nuk ka tre mesfushorë qendrorë me kaq shumë lojëra në fanellën e një kombëtareje.

Por…

Të shtunën, tre mesfushorët e mrekullueshëm kroat pësuan një disfatë të rëndë. Përvoja, njohuria dhe mençuria e tyre e madhe u mposht nga ritmi, forca dhe rinia e treshes së mesfushës spanjolle.

Rodri, Pedri dhe Fabian Ruiz kanë së bashku 76 vjet, dhe gjithsej 99 paraqitje në fanellën e “Furisë së Kuqe”. Ata janë 24 vjet më të rinj, ose tetë vjet për lojtar dhe kjo përbën me të vërtetë një ndryshim i madh, ndoshta ishte vendimtar në Berlin.

Mesfushorët qendrorë janë lojtarë që formësojnë lojën gjatë ndeshjes, drejtojnë ndeshjet, vendosin për ritmin e saj. Ata duhet të jenë luftëtarë dhe artistë në të njëjtën kohë. Gjë që nuk është kurrë e lehtë dhe sidomos kur arrin një moshë të caktuar, sepse sporti elitar është i pamëshirshëm dhe në nivelin më të lartë i njeh vetëm ata që janë në 100 për qind. Tashmë 99 për qind shpesh nuk mjafton…

Që kur Ivan Rakitic doli në pension, Modric, Kovacic dhe Brozovic janë tre emrat e parë që vendos në letër Zlatko Dalic kur ai fillon të krijojë një ekip për një ndeshje.

Treshja e padiskutueshme prej katër vitesh, është shtylla kurrizore e ekipit kroat, themeli që nuk është diskutuar kurrë. Dhe i cili praktikisht nuk luajti kurrë nën nivelet e tij. Deri të shtunën dhe ndeshjen ndaj spanjollëve, kur në mesfushë ishin shumë prapa rivalëve. Realisht, vetëm Mate Kovacic ishte ai që luajti në nivelin e lojtarëve spanjollë.

Me largimin e tij në Arabinë Saudite, Brozovic padyshim shkoi të paktën dy nivele më poshtë se futbolli që luajti te Inter-i. Dhe kjo është ndjerë në lojërat e tij prej disa kohësh.

Luka Modric së shpejti do të mbushë 39 vjeç. Dhe e gjithë kjo ndihet në fushë. Sidomos kur sheh se Ante Budimir (në korrik mbush 33 vjeç) dhe Andrej Kramaric (të mërkurën mbush 33 vjeç) që janë para tyre në sulm . Pesë nga gjashtë lojtarët kroat në mesfushë dhe sulm janë mbi 30 vjeç.

Kjo është shumë për futbollin e sotëm, veçanërisht për stilin jashtëzakonisht kërkues të lojës së turneut. Ekipet duhet të luajnë tre ndeshje në grup në 10 ditë dhe secila rezulton të jetë vendimtare.

Kundër një Spanjë dukshëm më të re, më të freskët dhe më të gjallë, problemi i moshës u ndje qartë gjatë ndeshjes. Me shtimin se spanjollët kanë edhe lojtarë me klas, shumë motorikë dhe të shpejtë. Gjë që u pa më së miri në momentet kur ata do të dilnin lart në presing, të cilit më së shumti kroatët nuk ishim në gjendje t’i përgjigjeshin. Është e vështirë të luash kundër atyre që janë më të shpejtë se ti, dhe teknikisht të barabartë.

Shqipëria e pret të mërkurën në Hamburg, e cila nuk ka aq lojtarë të mirë sa Spanja. Ata nuk kanë njohuritë e tyre, aq më pak shpejtësinë e tyre.

Tani shtrohet pyetja nëse Dalic duhet të prekë treshen e mesfushës, kur e di se ata do të kenë shumë më tepër hapësirë ​​dhe kohë kundër shqiptarëve sesa kundër spanjollëve.

Është e qartë që padyshim që do të startojnë Modric dhe Kovacic, sepse për këtë Dalic i nxori kundër Spanjës për të ruajtur sa më shumë freskinë për Shqipërinë. Megjithatë, paraqitja e Brozovic-it është e diskutueshme, pasi thamë se ai ka rënë dukshëm si lojtar që nga largimi në Arabi.

Ka lojtarë më të rinj, të ndryshëm, më vertikal dhe më shpërthyes si Sucic, Baturina…

Ajo për të cilën duhet të kujdeset Dalic është fakti që pas Shqipërisë do luajë një tjetër ndeshje vendimtare kundër Italisë.

Nuk do të mjaftojë një fitore ndaj Shqipërisë, duhet të jenë shumë të mirë ndaj Italisë, e cila është shumë më afër Spanjës për nga klasi, edhe pse jo aq e mirë. Prandaj Dalic duhet të vendosë forcat e tij me mençuri, që të mos i mbarojë energjia kundër Italisë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.