![](https://albanianpost.com/wp-content/uploads/2024/07/FotoJet-35.jpg)
Dy kamionë janë djegur dhe një veturë udhëtarësh është dëmtuar në orët e para të së martës në Mitrovicë të Veriut.
Lajmin për Albanian Post e ka konfirmuar zëdhënësi i policisë për rajonin e Veriut, Veton Elshani.
“Sot në mëngjes pak para orës 01.00 policia e Kosovës ka vërejtur një zjarr në rrugën Mbreti Petri në Mitrovica Veri. Dyshohet se persona të dyshimtë kanë vënë në zjarr dy kamionë (zjarri i është vënë mbi motorr) që ishin të parkuar para magazinës së tyre”, ka thënë Elshani për AP.
Duke shtuar se “një veturë po ashtu është dëmtuar si pasoj e zjarrit”.
Ai tutje ka sqaruar se s’ka të lënduar dhe policia është duke punuar për të qartësuar rastin i cili është cilësuar si “zjarrvënie”.
Në fillim të muajit qershor janë edhe djegur dy makina në vendin e njëjtë ku janë djegur edhe kamionët e fundit.
Më 8 mars, nënkryetares së Komunës së Zveçanit, Natasha Tomaniç, i ishin djegur dy lokale në qendër të Zveçanit.
Për rastin në fjalë ishte deklaruar edhe zëvendësministri i Administrimit të Pushtetit Lokal, Arbër Vokrri, i cili situatën e ka cilësuar si tentim i kotë për t’i frikësuar “serbët e çliruar nga thundra e terroristëve të Listës Serbe”.
Po ashtu zyrtares të Komunës paralele në Leposaviq i ishte djegur makina.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com