Dialogu politik dhe çështjet rajonale në fokus të takimit Hasani-Milanoviç

Ministri për Evropën dhe Punët e Jashtme, Igli Hasani u prit sot në një takim në Zagreb, Kroaci, nga presidenti Zoran Milanoviç.

Në një postim në rrjetet sociale, Hasani ndau momente nga takimi me presidentin Milanović.

Hasani tha se “gjatë takimit diskutuam për dialogun politik mes vendeve tona, duke theksuar rëndësinë e bashkëpunimit të vazhdueshëm për çështjet rajonale dhe globale”.

“Mes dinamikës gjeopolitike, shprehëm përpjekjet tona të përbashkëta për siguri dhe stabilitet në rajon, bazuar në parimet e fqinjësisë së mirë dhe gjithëpërfshirjes”, theksoi kryediplomati shqiptar.

Ky i fundit po zhvillon një vizitë zyrtare në Kroaci. Ditën e sotme Hasani u takua me kryeministrin Andrej Plenković, të cili i shprehu mirënjohjen e qeverisë shqiptare për marrëdhëniet e shkëlqyera mes dy vendeve tona dhe mbështetjen e vazhdueshme që Kroacia i ka dhënë Shqipërisë drejt integrimit evropian.

Hasani nis vizitën në Kroaci në takim me Plenkoviç, merr mbështetje për integrimin evropian

Më pas Hasani u prit në një takim nga ministri i Punëve të Jashtme dhe Evropiane, Gordan Grlić Radman, me të cilin zhvilloi edhe një konferencë për shtyp, ku deklaroi se “Shqipëria dhe Kroacia do të vazhdojnë të thellojnë bashkëpunimin dypalësh, në frymën e partneritetit strategjik edhe me qeverinë e re në Zagreb”.

Hasani u shpreh se ka ardhur koha për të zhvilluar një takim mes dy qeverive për të forcuar më tej bashkëpunimin mes dy vendeve, teksa shtoi se Shqipëria vlerëson mbështetjen e Kroacisë në rrugëtimin e Shqipërisë drejt BE.

“Dëshiroj t’ju konfirmoj se pas zgjedhjeve një javë më parë jemi besimplotë në bashkëpunimin me qeverinë e re të ardhshme në të njëjtën frymë të partneritetit strategjik, i cili është më i fortë sot dhe ushqehet nga prioritetet tona të përbashkëta të politikës së jashtme dhe i njëjti vizion për të ardhmen e Ballkanit Perëndimor. Këtë e dëshmon edhe dialogu intensiv politik midis dy qeverive në kuadrin dypalësh dhe atë rajonal”, tha Hasani.

Ky i fundit shtoi se “Shqipëria është mirënjohëse për mbështetjen e vazhdueshme të Kroacisë për integrimin në BE të Shqipërisë dhe vendeve të tjera të rajonit”.

“Pas anëtarësimit  në BE, arritjet tuaja janë inkurajuese për të gjithë ne. Gjatë takimit patëm një shkëmbim të frytshëm dhe të hapur mendimesh lidhur me zgjerimin dhe thellimin e mëtejshëm të bashkëpunimit dypalësh në të gjitha fushat. Gjykuam se ka ardhur koha për një takim ndërmjet dy qeverive G2G, pasi jemi të bindur se ky ndërveprim do t’i japë një dimension të ri, më të plotë bashkëpunimit dypalësh”.

Për ne – bën me dije Hasani, Kroacia është një nga vendet më të rëndësishme të Ballkanit, aksi që lidh Tiranën me Evropën në rrugë tokësore.

Kryediplomati i Shqipërisë vlerësoi Kroacinë edhe për ndihmën që po i jep Shqipërisë me ekspertizën e saj në kuadrin negociator për integrimin në BE.

“Kroacia është shembull pozitiv dhe shtytës i arritjes së qëllimit të anëtarësimit në BE në një kohë të shkurtër, tregues se përpjekjet dhe këmbëngulja shpërblehen. Modeli juaj është veçanërisht i rëndësishëm për ne që ta implementojmë në procesin tonë të integrimit. Diskutuam si të shkëmbejmë dhe vëmë në praktikë njohuritë tuaja në negociatat e anëtarësimit dhe ndihmën që  na keni ofruar në këtë proces. Gjej rastin t’ju falënderoj për asistencën tuaj konkrete me ekspertë të integrimit për ekipin tonë negociator”, tha Hasani.

Sipas tij, gjatë takimit me homologun Grlić-Radman u diskutua edhe për zgjerimin e bashkëpunimit, me në fokus turizmin. Hasani tha se linja direkte ajrore Tiranë-Zagreb, do të nxis edhe më tej turizmin mes dy vendeve.

“Diskutuam edhe si të rrisim bashkëpunimin në fushën e turizmit. 2023-i ishte një vit mbresëlënës për turizmin në Shqipëri me pothuajse 10 milionë turistë, dhe për ta bërë këtë zhvillim të qëndrueshëm, përvoja dhe bashkëpunimi mes nesh janë të vlefshme. Nisja e fluturimeve direkte mes Tiranës e Zagrebit në mes të qershorit, hap i rëndësishëm që shpresoj të vijohet nga të tjerë”, tha Hasani.

Në fjalën e tij, Hasani vlerësoi Kroacinë dhe për mbështetjen që i ka dhënë Diasporës shqiptare, si dhe për Integrimin e Kosovës në BE.

Kryediplomati i Shqipërisë u shpreh gjithashtu se “Diaspora shqiptare në Kroaci është një urë e qëndrueshme midis dy vendeve dhe për këtë arsye e çmojmë kontributin e saj si pjesë konstruktive e shoqërisë kroate.Më lejoni të shpreh vlerësimin më të lartë për mbështetjen e vazhdueshme që Kroacia i ka dhënë dhe i jep shtetit të Kosovës, demonstrim i së cilës ishte votimi së fundmi në favor të aplikimit të Kosovës për anëtarësim në Asamblenë Parlamentare të Këshillit të Evropës. Shqipëria dhe Kroacia janë të bindura se e ardhmja e Republikës së Kosovës është integrimi euroatlantik i saj, së bashku me vendet fqinje dhe mike në rajon”, nënvizoi Hasani.

Në fund, Ministri Hasani tha se siguria ishte një tjetër temë diskutimi.

“Në kushtet e sfidave të reja, të shkaktuara, ndikuara apo inkurajuara nga konteksti i zhvillimeve në Ukrainë, konstatuam nevojën për të rritur dhe forcuar bashkëpunimin dhe koordinimin dypalësh e shumëpalësh në rajon, por edhe partnerët evropianë e të NATO-s për t’iu bërë ballë sfidave të sigurisë sot dhe në të ardhmen”, përfundoi Hasani.

Kjo është vizita e parë zyrtare e ministrit Hasani në Zagreb.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.