Dhjetëra autobusë me serbë nga Veriu nisen për të votuar në zgjedhjet parlamentare Serbi

Dhjetëra autobusë me qytetarë serbë janë nisur këtë të diele nga stacioni i autobusëve në Mitrovicën e Veriut drejt Serbisë për të votuar në zgjedhjet parlamentare.

Qytetarët serbë nga Mitrovica Veriore, Zveçani dhe Leposaviqi do të votojnë në Rashkë, ata nga Zubin Potoku në Tutin, ndërsa do të ketë qendra të votimit edhe në Kurshumli e Vranje.

Siç raporton mediumi serb Kossev me seli në Veri, pranë stacionit të autobusëve po qëndrojnë edhe pjesëtarë të Policisë së Kosovës, KFOR-it dhe EULEX-it.

Policia ka hartuar një plan operativ për ditën e sotme lidhur me votimin masiv, ndërsa KFOR-i ka thënë se po ashtu është “i përkushtuar ndaj të gjitha masave për një mjedis të sigurt gjatë periudhës zgjedhore”.

Në këtë garë, forcat kryesore janë Partia Progresive Serbe (SNS), e presidentit serb Aleksandër Vuçiç dhe koalicioni i përbërë nga partitë opozitare “Serbia kundër dhunës”.

Në bazë të disa sondazheve që janë publikuar ditëve të fundit, e kanë nxjerrë të parën me mbi 40 për qind SNS-në.

Opozita serbe ka kritikuar vazhdimisht SNS-në – e cila ka pushtetin në Serbi që 10 vjet – se ka përdorur pushtetin për të ndikuar tek qytetarët serbë në orientimin e votës së tyre.

Në këto zgjedhje, do të marrë pjesë edhe lista “Beteja politike e shqiptarëve vazhdon – Shaip Kamberi”, ku synohet që Kamberi ta marrë edhe një mandat në Parlamentin e Serbisë, si deputeti i vetëm shqiptar atje.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.