Dëshmitë e gjashtë dëshmitarëve me shkrim ndaj ish krerëve të UÇK-së pranohen pjesërisht

Zëdhënësi i Dhomave të Specializuara të Kosovës (DhSK), Michael Doyle, ka bërë të ditur se janë pranuar pjesërisht dëshmitë e gjashtë dëshmitarëve me shkrim në çështjen e eprorëve të Ushtrisë Çlirimtare të Kosovës – kërkesë kjo që është bërë nga Zyra e Prokurorit të Specializuar.

Doyle, sqaroi se kjo është bërë për shkak se disa nga dëshmitarët kanë probleme shëndetësore, e disa të tjerë kanë vdekur.

“Më 3 maj, Trupi Gjykues miratoi pjesërisht kërkesën e Prokurorisë për pranimin e dëshmive me shkrim të gjashtë dëshmitarëve të cilët nuk mund të japin dëshmi me gojë për arsye të ndryshme, përfshirë për arsye mjekësore dhe shëndetësore, si dhe për faktin që disa dëshmitarë kanë vdekur”, tha Doyle.

Ndërkaq, për dëshmitarin i cili ishte planifikuar të jepte dëshmi përmes video-lidhjes e që më pas u vendos që të pranohet dëshmia e tij me shkrim tha se u bë për shkak të kohës së kufizuar.

“Gjykatësit konstatuan se kjo do të kontribuonte në kryerjen e shpejtë të procesit gjyqësor sepse shkurtonte kohën e nevojshme për dhënien e dëshmisë dhe ndihmonte mirëqenien e dëshmitarit, i cili ka probleme shëndetësore të rënda”.

“Në seancën e djeshme gjykatësit vendosën të pranonin deklaratën me shkrim të dëshmitarit, pa u marrë në pyetje nga ekipet e mbrojtjes, sikurse ishin pajtuar palët. Për rrjedhojë dëshmia përmes videolidhjes e caktuar për këtë të premte u anulua”.

Ndër të tjera, ai bëri të ditur se kryegjykatësi në këtë çështje ka potencuar se deri më 6 maj të 2024-së, janë pranuar dëshmitë e 105 dëshmitarëve që 45 prej tyre kanë qenë me shkrim.

Tutje, zëdhënësi i DhSK-së njoftoi se kryegjykatësi në këtë çështje ka thënë se deri më 6 maj janë pranuar dëshmitë e 105 dëshmitarëve që 45 prej tyre kanë qenë me shkrim.

Sa i përket çështjes gjyqësore ndaj Sabit Januzit, Ismet Bahtijarit dhe Haxhi Shalës, Doyle u shpreh se gjykatësi ka miratuar zgjatjen e afatit që mbrojtjes së tij iu është përcaktuar lidhur me procesin e nxjerrjes së materialeve.

“Gjykatësi i Procedurës Paraprake konstatoi se janë paraqitur arsye të vlefshme, pasi z. Shala synon të kundërshtojë pranueshmërinë e një audioincizimi dhe i duhet kohë për të analizuar siç duhet të gjitha materialet përkatëse pas nxjerrjes së tyre. Afati i ri për dorëzimin e kërkesave dhe kundërshtimeve nga Mbrojtja lidhur me procesin e nxjerrjes së materialeve është e hëna, 13 maj”, tha zëdhënësi i DhSK-së.

Gjykimi ndaj ish eprorëve të Ushtrisë Çlirimtare të Kosovës (UÇK), do të vazhdojë më 21 maj, kjo pasi që trupi gjykues për dëshmitarin e 62-të tha se dëshmitë e kaluara të tij mund të vendosen në prova.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.