“Dëshmia ime do të jetë në shërbim të së vërtetës”, nis dëshminë në Speciale gazetari Nuhi Bytyçi

Gazetari Nuhi Bytyqi, që kishte shërbyer gjatë periudhës së luftës ka nisur dëshminë në Dhomat e Specializuara të Kosovës (DhSK), prej ku është betuar që do të jetë në shërbim të së vërtetës.

Bytyqi, është dëshmitari i 71-të në gjykimin ndaj ish-krerëve të UÇK-së në Hagë.

“Ashtu si edhe në vitin 2019, kur kam dhënë dëshminë time para Dhomave të Specializuara, për të cilën e kam njoftuar opinionin publik, edhe kësaj radhe kam shprehur gatishmërinë për të thënë të vërtetën e veprimtarisë sime si gazetar gjatë luftës së lavdishme të Ushtrisë Çlirimtare të Kosovës”.

Ai ka deklaruar se është krenar me veprimtarinë e tij në shërbim të informimit të mirëfilltë për luftën e drejtë të Ushtrisë Çlirimtare të Kosovës.

“Simbolizon sakrificën sublime dhe mbijetesën e popullit, dhe që është lufta vendimtare për çlirimin dhe pavarësimin e Kosovës”.

“Dëshmia ime në Hagë, ashtu si çdo herë do të jetë në shërbim të së vërtetës së luftës çlirimtare të UÇK-së, të argumentimit të sakrificës së luftëtarëve të lirisë dhe mbështetjes së popullatës civile dhënë UÇK-së, të cilën unë dhe shumë kolegë të mi gazetarë e kemi prezantuar në mënyrë profesionale në ekranet televizive në mediat vendore dhe ato ndërkombëtare gjatë periudhës së luftës çlirimtare,” ka thënë ai.

Bytyqi ka marrë ftesë zyrtare nga DhSK-ja për të dëshmuar në procesin ndaj ish krerëve të Ushtrisë Çlirimtare të Kosovës, më 3 qershor.

Të martën ka përfunduar dëshminë në Speciale edhe dëshmitari i 70-të, por që dëshmia e tij është zhvilluar në seancë të mbyllur.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.