Departamenti Amerikan i Shtetit për Albanian Post: Largimi i serbëve nga institucionet potencial për eskalim të tensioneve

Departamenti i Shtetit Amerikan është i shqetësuar se largimi i serbëve nga institucionet e Kosovës krijon potencial për eskalim të mëtejme të situatës dhe rritje të tensioneve në terren, ka thënë për Albanian Post një zëdhënës për media.

“Largimi i serbëve të Kosovës nga institucionet nuk është zgjidhje për mosmarrëveshjet aktuale dhe ka potencialin për eskalim të mëtutjeshëm të tensioneve në terren. Të gjitha palët duhet të bëjnë hapa për të zvogëluar tensionet dhe të sigurojnë paqe dhe stabilitet”, thuhet në këtë përgjigje për Albanian Post.

Një retorikë çfarë po mbretëron aktualisht në raport me veriun e Kosovës vë jetë në rrezik, është thënë nga departamenti amerikan i shtetit.

“Aksionet dhe retorika që rritë mundësinë e dhunës vë jetë të pafajshme dhe të forcave ndërkombëtare paqeruajtëse që janë në terren në një rrezik të panevojshëm”.

Zëdhënësi amerikan ka potencuar gjithashtu se “Shtetet e Bashkuara të Amerikës pajtohen me Bashkimin Evropian se zhvillimet e fundit janë shqetësuese dhe vënë në rrezik progresin e rëndësishëm të arritur deri tani në dialogun e ndërmjetësuar nga BE”.

Në fund, thuhet edhe se “Kosova dhe Serbia duhet të implementojnë marrëveshjet të cilat tashmë i kanë nënshkruar në procesin e dialogut, duke përfshirë fillimin e bisedimeve për të themeluar Asociacionin e Komunave me Shumicë Serbe”.

Situata aktuale në Veri ka qenë temë diskutimi në takimin e sotëm ndërmjet kryeministrit të Kosovës dhe liderëve opozitarë.

Përpos situatës në Veri, në një ndër pikat e diskutuara, e cila elektrizoi atmosferën në mes të pranishmëve, ishte çështja e raporteve Kosovë-ShBA.

Ndonëse për të parin e ekzekutivit, Albin Kurtin, raportet me ShBA-të nuk kanë pësuar asnjë dëmtim, por “përkundrazi, ka dendësi të komunikimit”. Megjithatë me të njëjtën konstatim nuk ishte pajtuar kryetari i Aleancës për Ardhmërinë e Kosovës, Ramush Haradinaj, i cili qe i pari që lëshoi takimin në fjalë.

Haradinaj pasi doli nga objekti i Qeverisë, i indinjuar me qëndrimin e Kurtit në raport me ShBA-të, kritikoi këtë të fundit se i njëjti po mbante ligjërata e nuk po sqaronte “pse i ka prishur raportet me Amerikën”.

Në anën tjetër kryetari i Partisë Demokratike të Kosovës, Memli Krasniqi i cili lëshoi takimin pak më vonë, shprehu skepticizimin e tij se “kryeministri e Qeveria e din se në çfarë rruge kanë hyrë, e si do të duhet të dalin suksesshëm duke e ruajtur tërësinë e Kosovës edhe funksionimin e shtetit”.

Mendimet e Haradinajt e Krasniqit për paqartësinë e kryeministrit në takim, i ri-konfirmoi edhe kryetari i Lidhjes Demokratike të Kosovës, Lumir Abdixhiku.

As ai, njëjtë si dy të parët, s’kishte parë të ekzistojë ndonjë strategji operimi – ose të paktën atë s’ua kishte shpalosur atyre Kurti.

Për kureshtarët se çfarë u bisedua në takimin e përbashkët, Abdixhiku shoi kureshtjen.

Ishte pak a shumë ajo që e thotë publikisht, veçse tash na e tha privatisht, pohoi.

Ndryshe “Lista Serbe” vendosi të shtunën e 5 nëntorit që pjesëtarët e saj të largohen nga institucionet e Kosovës.

Kjo, pas një takimi të zhvilluar në mesditën e së shtunës në Zveçan.

Serbët nuk do të kthehen në institucionet e Kosovës deri në momentin kur Qeveria e Kosovës do të tërheqë vendimin për targat dhe fillon formimin e Asociacionit për komunat me shumicë serbe.

Kryetari i Listës Serbe (njëkohësisht ministri për Komunitete dhe Kthim), Goran Rakiç, u dorëhoq nga pozita të cilën e ka drejtuar pak më shumë se një vjet e gjysmë.

Edhe Igor Simiç, i cili është deputet në radhët e Listës Serbe ka dhënë dorëheqje nga kjo pozitë.

Serbët kanë vendosur që të largohen edhe nga gjyqësori si dhe Policia.

“Ne kemi vendosur të largohemi nga të gjitha institucionet politike, Kuvendi, Qeveria, dhe nga katër komunat në veri të Kosovës, por edhe që të largohen serbët nga gjyqësori, policia si dhe stafi administrativ në katër komunat në veri”, theksoi Rakiç pas takimit.

Në anën tjetër zyrtarë të Policisë së Kosovës, pas vendimit të Listës Serbe për t’u larguar nga të gjitha institucionet kanë larguar nga trupi i tyre uniformat e Policisë së Kosovës.

“Ligjëratat” e kryeministrit, të padobishme për opozitarët – “s’tregon, s’di, s’ka plan”

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.