Dënimet e Gjykatës Speciale shkojnë në gjysmë-shekulli burgim për vetëm katër të dënuar të UÇK-së
![](https://albanianpost.com/wp-content/uploads/2024/07/FotoJet-2024-07-16T160513.157.jpg)
Ish-eprori i Ushtrisë Çlirimtare të Kosovës, Pjetër Shala, i cili u dënua këtë të martë për krime lufte nga trupi gjykues i Gjykatës Speciale me 18 vjet burgim, është i dënuari i katërt nga Specialja pas Hysni Gucatit, Nasim Haradinajt dhe Salih Mustafës.
Të parët ishin dënuar nga Specialja ish-krerët Organizatës së Veteranëve të Luftës së Ushtrisë Çlirimtare të Kosovës, Hysni Gucati dhe Nasim Haradinaj gjatë vitit 2022.
Të dy ishin shpallur fajtorë për pengim të administrimit të drejtësisë dhe u dënuan me nga katër vjet e gjysmë burgim dhe me një gjobë prej 100 eurosh.
Por, në shkurt të 2023-s, Apeli ua uli dënimin në katër vjet e tre muaj burgim, ndërsa në fund të 2023-s ua modifikoi dënimet duke i liruar me kusht.
Gjatë vitit 2022, Specialja e kishte dënuar për krime lufte me 26 vjet burgim edhe Salih Mustafën.
Mustafa i njohur me nofkën “Cali” ishte shpallur fajtor në disa pika – “torturë si krime lufte, ndalim arbitrar si krim lufte, vrasje e paligjshme” në fshatin Zllash të Prishtinës.
Aktualisht në është duke u zhvilluar një rast gjyqësor, ai ndaj ish-krerëve të UÇK-së – Hashim Thaçi, Kadri Veseli, Jakup Krasniqi dhe Rexhep Selimi – që akuzohen për krime lufte dhe krime kundër njerëzimit.
Në procesin gjyqësor që nisi më 3 prill 2023, katër ish-drejtuesit e UÇK-së u deklaruan të pafajshëm rreth akuzave për krime lufte.
Kritikat për Specialen
Kritika për punën e Speciales, pas vizitës që i kishte bërë krerëve të UÇK-së në Hagë, kishte edhe kryetari i Kuvendit, Glauk Konjufca.
Ai pati thënë se mënyra si po funksion Gjykata Speciale karakterizohet me defekte të shumta.
Sipas tij, prokuroria si organ i ndjekjes e ka bërë një aktakuzë, e cila nuk niset nga principi individual i krimeve të supozuara.
“Pra, unë isha atje dhe prej një vështrimi e kam krijuar përshtypjen si është e Kosovës ajo gjykatë, ajo nuk është hiç e Kosovës. Si është e Kosovës, në çfarë mënyre është e lidhur me vullnetin e popullit?”, kishte theksuar ai.
Por, ministrja e Drejtësisë, Albulena Haxhiu, kishte potencuar se ende janë në fazën e diskutimit për themelimin e një mekanizimi për monitorim të Gjykatës Speciale, derisa shton se kërkesën tashmë e kanë dorëzuar te kryetari i Kuvendit të Kosovës, Glauk Konjufca.
“Sipas informacioneve që i kam, tashmë janë duke diskutuar për një trupë profesionale që e trajton aspektin e të drejtave të njeriut, sepse nuk ka asnjë instancë ndonjëherë që ka pasur, që nuk e ka pasur një institucion tjetër për ta monitoruar, ta zëmë Tribunali i Hagës e ka pasur OKB-në, mirëpo jo Gjykata Speciale nuk e ka asnjë të tillë”, pati treguar ajo.
Përkundër kritikave për punën e Gjykatës Speciale, gjatë vitit 2022, kryetarja Ekaterina Trendafilova, në një intervistë për AP tha se e vërteta e numrave flet ndryshe.
“Në fakt, sondazhi ynë rreth opinionit publik vitin e kaluar tregoi se, pavarësisht atyre që vokalisht kundërshtojnë Dhomat e Specializuara të Kosovës, shumica e njerëzve besojnë se gjykata do të sigurojë që të drejtat e të akuzuarve të respektohen, që procedimet do të jenë të drejta dhe se do të bëjmë çfarë të mundemi për të mbrojtur dëshmitarët”.
Por, Trendafilova deklaron se, përkundër që Specialja nuk është krijuar të jetë popullore, ajo vetë dhe në përgjithësi struktura e kësaj Gjykate “mbetet e përkushtuar që të sigurojë se informacionet rreth punës dhe mandatit të saj të jenë të shpërndara në mënyrë transparente”.
Ndryshe, Dhomat e Specializuara dhe Zyra e Prokurorit të Specializuar hetojnë krimet e pretenduara të pjesëtarëve të Ushtrisë Çlirimtare të Kosovës, të kryera kundër pakicave etnike dhe rivalëve politikë që nga janari i vitit 1998 deri në dhjetor të vitit 2000.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com