Delegacioni i Luginës: I njoftuam Bilcik-un dhe von Cramon-in për diskriminimin sistematik që na bëhet nga Beogradi

Ish-Kryetari i Këshillit Kombëtar Shqiptar në Serbi, Ragmi Mustafi, ka njoftuar se gjatë vizitës në Strasburg, së bashku me një delegacion nga Lugina e Preshevës, janë takuar me raportuesin e Parlamentit Evropian për Serbinë,  Vladimir Bilcik, si dhe me raportuesen për Kosovën, Viola von Carmon.

Mustafi përmes një postimi në rrjetin social “Facebook”, ka theksuar se në takimin me raportuesit për Kosovë dhe Serbi i kanë njoftuar “me pozitën e vështirë dhe diskriminimin sistemik ndaj Luginës nga Beogradi”.

“I kërkova Bilcik-ut që në progres raportin për Serbinë të përfshihet situata e shqiptarëve në Luginën e Preshevës”, shkroi Mustafi në “Facebook”.

Kjo për shkak se “ky raport drejtpërdrejtë po ndikon në jetën dhe zhvillimit e Luginës, në të ardhmen tonë e pasardhës tanë”, duke shtuar se kanë shprehur “indinjatën me mos korrektësinë e përfshirjes në raport” të Luginës së Preshevës.

Ndryshe, shqiptarët që jetojnë në Serbi vazhdimisht diskriminohen nga Beogradi. Madje, një nga politikat e shtetit serb që është duke u aplikuar kundrejt shqiptarëve etnikë është pasivizimi i adresave të tyre.

Ky shqetësim është përmendur edhe në raportin e Departamentit Amerikan të Shtetit për Serbinë, si dhe në atë të Bashkimit Evropian.

Raporti i Departamentit Amerikan të Shtetit për të Drejtat e Njeriut për vitin 2022 në Serbi i publikuar me 20 mars kishte vënë në pah diskriminimin e shqiptarëve etnikë që jetojnë në Serbi dhe po ashtu ka përmendur pasivizimin e adresave.

“Shqiptarët etnikë ishin subjekt i diskriminimit dhe papunësisë disproporcionale. Udhëheqësit shqiptarë etnikë në Serbi pretenduan se qeveria i nënshtronte në mënyrë disproporcionale shqiptarët etnikë ndaj “pasivizimit” për të zvogëluar numrin zyrtar të shqiptarëve etnikë që jetojnë në Serbi”, thuhej në raport.

Tutje, duke iu referuar raportit të vitit 2021 nga Komiteti i Helsinkit për të Drejtat e Njeriut në Serbi, thuhet se zbatimi “joproporcional i këtij ligji nga qeveria që synonte shqiptarët – përbënte ‘spastrimin etnik me mjete administrative’”.

“Raporti vuri në dukje se individët e pasivizuar nuk mund të rinovojnë kartën e identitetit ose pasaportën e tyre të skaduar, pa të cilën ata nuk ishin në gjendje të regjistronin një makinë, të kishin akses në kujdesin shëndetësor ose shërbime sociale (përfshirë pensionet), të blinin ose shesin prona ose të votonin në zgjedhjet lokale ose të përgjithshme”.

Ndërkaq, aty është përmendur se shumë persona që janë përballur me këtë fenomen, kanë raportuar se “për pasivizimin e tyre dhe shumica mësojnë se janë pasivizuar shumë kohë pas faktit kur tentonin të rinovonin dokumentet e tyre të identitetit”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.