Deklarimi i pasurisë: Osmani banesë, shtëpi e Mercedes, Konjufca mbi 6000 euro para të gatshme

Presidentja e Kosovës, Vjosa Osmani, në deklarimin e pasurisë ka thënë se e posedon një banesë, një shtëpi, një tokë dhe një veturë të tipi “Mercedes”.

Para të gatshme, ajo ka deklaruar se ka 3 qind euro në një bankë në Kosovë.

Të ardhurat vjetore ka deklaruar se i ka 33 mijë e 32 euro, ndërsa taksa në mëditje, udhëtime zyrtare 7 mijë e 678 euro.

Bashkëshorti i saj, pra zotëriu i parë, Prindon Sadriu, ka deklaruar se përfiton 36 mijë e 966 euro nga buxheti i Kosovës.

Ndërkaq, pasuri të paluajtshme ajo ka regjistruar në pronësi të saj kapital në vlerë prej rreth 970 mijë eurosh, e që kryesisht janë nën pronësi të bashkëshortit. Duke përfshirë këtu një shtëpi, një banesë, një garazh dhe tokë.

Ndërsa, Kryetari i Kuvendit të Kosovës, Glauk Konjufca, si pasuri të paluajtshme ka deklaruar një banesë në vlerë prej 60 mijë e 7 qind 93 euro, një depo në vlerë prej 5 qind eurosh si dhe një parking me vlerë prej 6 mijë euros.

Para të gatshme Konjufca ka deklaruar se ka 6 mijë e 6 euro e 49 cent.

Aty figuron se Konjufca ka marrë kredi prej 55 mijë euro për ta paguar banesën, ku do t’i paguajë edhe 36 mijë e 5 qind e 95 euro.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.