Deklarimi i Bislimit s’e Kosova s’dërgon “artikuj gazetash” në Kushtetuese mund “ta acarojë BE-në” – edhe pse ka konsensus për heqjen e masave

Kosovës mund t’i largohen masat ndëshkuese të vendosura në qershor të vitit të kaluar nga Bashkimi Evropian për shkak të veprimeve të Qeverisë në Veri, por ish-diplomatet Mimoza Ahmetaj dhe Alma Lama thonë për Albanian Post se deklarimi i zëvendëskryeministrit, Besnik Bislimi se Qeveria nuk dërgon në Gjykatën Kushtetuese drafte e “artikuj gazetash” mund ta “acarojnë BE-në” gjashtë ditë para mbajtjes së Komitetit të Ministrave për Punë të Jashtme të Unionit.

“Nëse vendoset në rend të ditës kjo temë atëherë edhe mund të hiqen sanksionet sepse është arrit konsensus në mes të liderëve të shteteve, por druaj se në një situatë të acaruar dhe polarizuar edhe më tepër pas zgjedhjeve që diçka e tillë do të bëhet. Për më tepër, deklaratat e sotme acaruese dhe të papërmbajtura të zotëri Bislimi në lidhje me draft-statutin vetëm sa e acarojnë BE-në”, tha ish-ministrja e Integrimeve Evropiane.

Për Ahmetajn, “është fatkeqësi” që shumë nga deklaratat e zyrtareve të lartë në Prishtinë në lidhje me këtë behën duke mos pasur ndonjë kontakt apo komunikim me BE-në, por me hamendje, derisa ka shtuar se masat e kanë dëmtuar Kosovën jo vetëm në aspektin ekonomik, por kanë shkaktuar “dëme të pariparueshme” edhe ne aspektin politik.

“Prishja e raporteve me partnerët ndërkombëtarë është çmimi më i lartë që po e paguajmë dhe kjo u vërtetua edhe me Këshillin Evropës. Uroj që qeverinë e ardhshme ta udhëheqë PDK-ja në mënyrë që t’i jap fund kësaj katrahure në të cilën vendi është zhytë”, ka potencuar ish-ministrja Ahmetaj, tash nënkryetare e PDK-së.

Ndërkaq në këndvështrimin e ish-ambasadores së Kosovës në Itali, Alma Lamës, masat ndëshkuese ndaj Kosovës nuk do të hiqen në tërësi edhe pse për këtë u shpreh optimist zëvendëskryeministri Bislimi, i cili gjatë raportimit në Komisionin për Integrime Evropiane këtë të enjte, theksoi se ka informacione se “është rekomanduar heqja e masave sanksionuese ndaj Kosovës nga BE-ja”.

“Shpresojmë që masat që ka vënë BE-ja ndaj Kosovës të hiqen. Por, në bazë të indikacioneve kam përshtypjen se ato nuk do të hiqen në tërësi, sepse përveçse nuk janë plotësuar kushtet për të cilat janë vënë, ka pasur edhe tema të tjera për të cilat është kritikuar Kosova nga ana e Bashkimit Evropian dhe vendeve të QUINT-it”, potencoi Lama për AP.

Si “pengesë” për heqjen e masave, Lama e sheh edhe rregulloren e re të Bankës Qendrore të Kosovës për operacionet me paratë e gatshme e cila ka hyrë në fuqi më 1 shkurt e ku thuhet se valuta e vetme e lejuar për kryerjen e pagesave është euro, por edhe shpronësimet në Veri, meqë vendet e QUINT-it, Bashkimit Evropian dhe misioni i OSBE-së në Kosovë thonë se “Qeveria e ka shkelur ligjin”.

“Dy tema të tjera janë implementimi i rregullores së re për Bankën Qendrore të Kosovës si dhe shpronësimet në Veri të Kosovës. Një vit pas masave, Kosova ka humbur miliona euro nga BE-ja si dhe besueshmërinë, që është tepër e rëndësishme”, ka theksuar ish-deputetja e Lidhjes Demokratike të Kosovës.

Në fillim të këtij muaji, Kryeministri i Kosovës, Albin Kurti, në një deklaratë për gazetarë theksoi se “nuk varet prej qeverisë” largimi i masave ndëshkuese që BE-ja vendosi ndaj vendit vitin e kaluar, duke insistuar se tashmë janë ndërmarrë të gjithë hapat e nevojshëm për de-përshkallëzimin e situatës në pjesën veriore të territorit kosovar të banuar me shumicë serbe.

Në anën tjetër, kryetari i Aleancës Kosovare të Bizneseve, Agim Shahini, ka thënë se nëse masat Bashkimit Evropian ndaj Kosovës vazhdojnë më tutje dëmet do të jenë mbi 500 milionë euro.

Ndryshe, përveç masave, Kosovës i është anuluar pjesëmarrja edhe në stërvitjen ushtarake ‘Defender Europe 2023’ pas situatës së tensionuar në Veri, ku kryetarët e komunave hynë në ndërtesat komunale, mes kundërshtimeve të serbëve lokalë nën asistimin e Policisë së Kosovës.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.