Deklaratat e krerëve të shtetit për luftë po e “tranojnë” popullin e po i “trembin” investitorët e huaj
![](https://albanianpost.com/wp-content/uploads/2024/07/kreret-e-shtetit.jpg)
Deklaratat e krerëve të shtetit se në “rajon do të shpërthejë një luftë”, apo se Serbia mund ta përsërisë Banjën, sipas njohësve të çështjeve të sigurisë dhe atyre politike, janë duke e shqetësuar popullin dhe duke larguar investitorët e huaj.
Por, megjithatë, të prononcuarit e Albanian Post, kanë theksuar se Kosova duhet të jetë vigjilente, duke qenë se qëllimet e Serbisë ndaj Kosovës janë të qarta.
Më 8 korrik, në një intervistë për median kroate Vecernji List, Ministrja e Punëve të Jashtme dhe Diasporës, Donika Gërvalla, tha se në rajon do të shpërthejë një luftë e gjithanshme, “për shkak të tolerimit të vazhdueshëm që Perëndimi po i bënë politikës së presidentit serb, Aleksandër Vuçiç”.
Ndërsa, vetëm dy ditë më pas, më 9 korrik, Kryetari i Kuvendit, Glauk Konjufca, pas një takimi që pati me Presidentin e Këshillit Kombëtar të Zvicrës, Eric Nussbaumer, deklaroi se nëse Serbia nuk ndëshkohet për agresionin e 24 shtatorit të vitit të kaluar, “ka për ta përsëritur këtë skenar”.
Por, sipas ish-Komandantit të Forcës së Sigurisë së Kosovës (FSK), Kadri Kastrati, institucionet kosovare “nuk do të duhej që të japin deklarata të tilla”, sepse, siç pohon ai për Albanian Post, “janë duke e tranuar këtë popull e janë duke i trembur investitorët e huaj”.
“Dhe një prej arsyeve që në Kosovë është situata e tillë, ose largimi i njerëzve nga Kosova, pikërisht unë konsideroj që bazohen në këto deklarata të cilat po thuhen nga krerët e shtetit”, tha Kastrati.
Në vlerësimin e tij, “nuk ka rrezik për luftë”, pasi që potencon se “Kosova është shumë e sigurt, NATO-ja është në Kosovë”.
“Aleanca është garantuese e kufijve të Kosovës dhe Policia e Kosovës, institucionet e sigurisë brendapërbrenda shtetit të Kosovës janë duke e kryer punën në mënyrë profesionale dhe nuk mendoj që ka ndonjë rrezik”, shtoi.
![](https://sinjali.com/wp-content/uploads/2023/06/kadri-kastrati-foto-xhemail-sllovinja-2.jpg)
Përkundër kësaj, Kastrati bën thirrje që vigjilenca duhet të jetë maksimale, “sepse Serbia do të tentojë të përsërisë shtatorin e vitit të kaluar me grupe ndoshta më ndryshe që, siç planifikojnë ata, të kenë sukses”.
“Por, Kosova tashmë veç i dinë synimet dhe planet e Serbisë dhe është e përgatitur për një gjë të tillë dhe nuk mendoj që do të ketë probleme të tilla”.
Përveç këtyre, ish-Komandanti i FSK-së pati edhe një sugjerim për autoritetet e Kosovës, posaçërisht ato të sigurisë.
“Tash inteligjenca e policia i dinë përafërsisht kush janë ata njerëz që e përbejnë këtë Brigadën e Veriut [e shpallur organizatë terroriste nga Kosova] dhe duhet t’i monitorojë, t’i vëzhgojë e përcjellë dhe mos t’i lë që ata të vijnë deri te veprimet që i marrin urdhrat nga Lista Serbe dhe nga vetë kryekrimineli Milan Radojiçiç”, potencoi.
Për Kastratin nuk ka asnjë dyshim që Lista Serbe si parti politike është në krye të këtyre manovrimeve që Serbia është duke i bërë.
Ndërsa, njohësi i çështjeve politike, Shkodran Ramadani, pohon se nuk mund ta di çfarë informacione kanë zyrtarët shtetërorë kur po i bëjnë këto deklarata, por shton se mund të jetë edhe “lojë thjesht për zgjedhje”, për shkak se është vit elektoral.
“Dhe në mungesë të sukseseve ekonomike, rritjes së vendeve të punës, tash mund të ndodh me retorikë nxitëse, në një valë të nacionalizimit edhe tensionimet në përgjithësi të skenës politike në mënyrë që të mbetet situata politike e polarizuar, të largohet vëmendja prej problemeve ekonomike, problemeve sociale, pra brengave që qytetarët i kanë me inflacionin, me çmimet e larta, me papunësinë…”, thekson Ramadani për AP.
![](https://rajonipress.com/file/2021/06/shkodranrammm1.jpg)
Por, gjithsesi, ai sugjeron se duhet të presim reagimet e udhëheqësve të shteteve të tjera, por edhe njohësve të sigurisë, “të cilët besoj që do t’i demantojnë, sepse nuk duket që ka terren për luftë në rajon, së paku në këto rrethana”.
“Kështu që besoj që është më tepër material për konsum të brendshëm elektoral”.
Ndryshe nga seç thanë Gërvalla e Konjufca, por edhe eksponentë të tjerë të pushtetit, Ministri i Financave, Punës dhe Transfereve, Hekuran Murati, konsideroi se situata në Kosovë është e qetë dhe nuk ka rrezik për luftë.
Sipas Ramadanit, kjo deklaratë e Muratit është një përpjekje “për t’i qetësuar njerëzit e sektorit të biznesit, të cilët sa herë që flitet për luftë humbasin kapital, sepse stabiliteti është i domosdoshëm për zhvillim ekonomik”.
Së fundi edhe Kryeministri i Kosovës, Albin Kurti, në një intervistë për prestigjiozen amerikane, CNN, ka potencuar se “Serbia është shumë agresive ndaj Kosovës”.
“Fillimisht duke mos e njohur si shtet të pavarur, krahas kësaj është e angazhuar në luftë hibride dhe bën stërvitje ushtarake në kufi”, i tha ai gazetares britaniko-iraniane, Christiane Amanpour.
Duke nënvizuar faktin se Serbia ka 48 baza operative përgjatë kufirit me Kosovën, Kurti potencoi se Beogradi është “në pritje të një dritareje të re të mundësive”.
“Ajo çfarë kërkojmë nga partnerët perëndimorë është që t’i bëjnë presion Beogradit që t’i tërheqin këto baza, që secila që ka 50-150 ushtarë, oficerë me pajisje, municion dhe armatim ushtarak ruse, por edhe atë kinez”, ka shtuar ai.
Nga aspekti politik, sipas Kurtit, Serbia është e ngjashme Rusinë.
“Ata nuk njohin de facto dhe de juro fqinjët e tyre, i shkaktojnë problemeve fqinjëve, sepse duan të zgjerohen”, potencoi ai.
Kurti, ndër të tjera, gjatë intervistës tha edhe se Rusia dhe Serbia, historikisht, e kanë imituar njëra-tjetrën.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com