“Deklarata e Muratit ndaj mediave është sulm direkt” – shoqëria civile kërkon që pushteti të përmbahet nga deklaratat linçuese

Organizatat e shoqërisë civile që janë anëtare të Human Rights Network (HRN), kanë reaguar ndaj ministrit të Financave, Hekuran Murati, i cili në seancën e së enjtes deklaroi se “raporti i Departamentit Amerikan të Shtetit në disa raste ka rënë pre e dezinformatave të mediave të cilat ende janë pjesë e gardës së vjetër e madje edhe disa organizatave të shoqërisë civile që maskohen si të tilla”.

Përmes një komunikate për media nga shoqëria civile është konsideruar se të njëjtat janë sulme direkte ndaj mediave.

“Deklarata me akuza të tilla drejtuar OJQ-ve dhe mediave në Kosovë me pretendimin se janë të kapura nga Qeveritë paraprake, janë sulme direkte ndaj këtyre të fundit”.

“Një praktikë linçuese e kësaj natyre ndaj OJQ-ve, dhe mediave, pikërisht në prag të Ditës Botërore të Lirisë së Shtypit, është një tregues i mungesës së bashkëpunimit, i një nënçmimi dhe degradimi të punës së aktivistëve/eve dhe gazetarëve/eve e mediave nga Ministri i Qeverisë Kurti”, thuhet në reagim.

Deklarata të ngjashme është thënë se i kontribuojnë trendit negativ në renditjen e Kosovës në listat për liri të shtypit.

“Pikërisht duke u nisur nga kjo praktikë e rrezikshme e linçimit dhe denigrimit të punës së OJQ-ve dhe mediave dhe shumë rasteve të tjera në vitin e fundit, sot Kosova ka shënuar regres alarmant duke u rradhitur 19 vende më poshtë në indeksin e Reporters Without Borders në lirinë e medias. Deklarata si kjo e Ministrit Murati i kontribuojnë tutje këtij trendi negativ”.

Teksa apeli i tyre ka qenë që pushteti të përmbahet nga deklaratat linçuese.

“Të shfrytëzojnë raportet e tilla si kritika konstruktive ndaj punës së tyre dhe të punojnë drejt përmirësimit të situatës”.

Organizata “Reporterët Pa Kufij”, të premten, ka publikuar Indeksin vjetor Botëror mbi Lirinë e Shtypit, Kosova është radhitur e 75-ta duke humbur 19 vende nga viti i kaluar kur ishte listuar e 56-ta.

Ky është vlerësimi më negativ që i është bërë Kosovës në dekadën e fundit.

Në vitin 2014 Kosova ishte vlerësuar me notën 70.71 nga kjo organizatë, ndërsa gjatë viti 2024 Kosova ka grumbulluar vetëm 60.19 pikë.

Në vitin 2023, Kosova ishte vlerësuar me notën 68.38. Në vitin 2023 me notën 68.38. Në vitin 2022 me notën 67. Në vitin 2021 me notën 69.68. Në vitin 2020 me notën 70.67.

Në vitin 2019 me notën 70.32. Në vitin 2018 me notën 70.39.

Në vitin 2017 me notën 69.55. Në vitin 2016 me notën 69.5. Në vitin 2015 me notën 69.37.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.