Deficiti tregtar i Republikës së Kosovës s’ka pasur përmirësim në shifra, vetëm sa është thelluar.
Në publikimin e fundit nga Agjencia e Statistikave të Kosovës (ASK), për të dhënat lidhur me rrjedhat e eksportit dhe importit për muajin tetor 2021, hendeku i eksportit dhe importit është i madh.
Të dhënat nga Tregtia e Jashtme e Mallrave në Kosovë tregojnë për një deficit tregtar më të lartë për 33.3% në muajin tetor 2021, në raport me periudhën e njëjtët të vitit 2020.
Gjegjësisht në vlerë prej 355.8 milionë euro, krahasuar me deficitin prej 267.0 milionë euro në vitin 2020. Eksporti mbulon importin me vetëm 17.0% sipas ASK-së.
Eksporti i mallrave në muajin tetor 2021 kishte vlerën 72.6 milionë euro, ndërsa importi 428.5 milionë euro, që është një rritje prej 43.5% për eksport dhe 34.9% për import, duke krahasuar me periudhën e njëjtë të vitit 2020.
Kosova si shtet më së shumti eksporton metale, ndërsa pjesa tjetër janë artikuj të ndryshëm.
“Sipas të dhënave të grupeve kryesore të eksportit: 26.5% të eksporteve e përbëjnë metalet bazë dhe artikujt prej tyre; 26.4% e përbëjnë artikujt e ndryshëm të prodhuar; 11.9% e përbëjnë plastika, goma dhe artikujt prej tyre; 7.9% e përbëjnë ushqimet e përgatitura”.
“Pijet dhe duhani; 5.9% e përbëjnë produktet minerale; 4.9% e përbëjnë produktet bimore; 2.9% e përbëjnë makineritë, pajisjet mekanike dhe elektrike”, thuhet në publikimin e ASK-së.
Eksportet e Kosovës në vendet e BE-së (27) arritën në 22.8 milionë euro, ose rreth 31.4% e eksporteve të përgjithshme, me një rritje prej 39.7%. Partnerët kryesorë për eksportin e mallrave në BE ishin: Gjermania (9.4%), Italia (6.0%), Holanda (2.7%), etj.
Importet e Kosovës nga vendet e BE-së (27) ishin rreth 175.7 milionë euro, ose 41.0% e importeve të përgjithshme, me një rritje prej 34.6%. Importet me pjesëmarrje më të lartë ishin nga: Gjermania (11.7%), Italia (6.1%), Greqia (3.6%), Sllovenia (3.6%), etj.
Në muajin tetor 2021, eksportet e Kosovës me vendet e CEFTA-s arritën në 24.1 milionë euro, ose 33.2% të eksporteve të përgjithshme, me një rritje prej 19.2%. Partnerë kryesorë për eksport nga vendet e CEFTA-s ishin: Shqipëria (12.2%), Maqedonia e Veriut (10.8%), Serbia (5.1%), dhe Mali i Zi (4.0%).
Ndërsa, importet nga vendet e CEFTA-s në muajin tetor 2021, arritën në 90.3 milionë euro, ose 21.1% të importeve të përgjithshme, me një rritje prej 31.5%. Vendet me pjesëmarrje më të lartë për import ishin: Serbia (7.3%), Shqipëria (6.3%), dhe Maqedonia e Veriut (5.6%).
Eksportet e Kosovës me vendet e tjera të botës arritën në 25.6 milionë euro, ose 35.3%. Si partnerë më të rëndësishëm nga këto vende për eksport vlen të përmenden: SHBA (20.3%), dhe Zvicra (8.4%).
Ndërsa, importet e Kosovës me vendet e tjera të botës arritën në 162.3 milionë euro, ose 37.9%. Vendet me pjesëmarrje më të lartë për import në këtë grup ishin: Turqia (12.0%) dhe Kina (10.7%).
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
