“Debakli politike dhe diplomatike e Qeverisë Kurti”, thotë Çitaku pas vendimit të BE-së për pasaportat serbe
![](https://albanianpost.com/wp-content/uploads/2022/05/Vlora-Citaku-696x464-1.jpg)
Nënkryetarja e Partisë Demokratike të Kosovës (PDK), Vlora Çitaku, ka fajësuar Qeverinë e Kosovës për vendimin e Bashkimit Evropian që vendosi t’i njoh pasaportat e Serbisë që lëshohen për serbët e Kosovës.
Çitaku, përmes një shkrimi në rrjetin social ‘Facebook’, ka thënë se ky vendim është “debakël politik dhe diplomatik”.
“Pra, pasaportat e lëshuara nga strukturat paralele të Serbisë paskan marrë sot vulë legjitimiteti nga B.E. Çfarë debakli politik dhe diplomatik për Qeverinë Kurti. Ja ku e sollën Kosovën sjelljet infantile dhe aventureske të kësaj kaste udhëheqëse”, ka shkruar Çitaku në Facebook.
Këshilli i Bashkimit Evropian ka marrë vendim që të ua liberalizojë vizat serbëve të Kosovës që mbajnë pasaporta të Serbisë që lëshohen nga Zyra Koordinuese e Ministrisë së Punëve të Brendshme të Serbisë, ku sipas të cilave Kosova është pjesë e Serbisë.
Lajmi është bërë i ditur përmes një komunikate për media nga Këshilli Evropian.
“Këshilli vendos heqjen e vizave për mbajtësit e pasaportave serbe të lëshuara nga Drejtoria Koordinuese Serbe”.
“Miratimi i sotëm nga Këshilli përfundon procesin legjislativ. Me hyrjen në fuqi të rregullores, e cila do të ndodhë në ditën e 20-të pas botimit në Fletoren Zyrtare të BE-së, ajo do të bëhet e zbatueshme në të gjitha shtetet anëtare të BE-së”, thuhet në komunikatë.
Qeveria e Kosovës, në një reagim për media ka thënë se vendimi është një nguti e pashpjegueshme e BE-së.
“E pashpjegueshme është dhe ngutia e shfaqur për marrjen e këtij vendimi, pa vërtetuar faktet në terren, pa analizuar implikimet që munden dhe do të përcjellin zbatimin e vendimit, dhe pa konsultuar që nga fillimi institucionet e shtetit tonë”, thuhet në reagimin e tyre.
Reagimi vazhdon me fraza të pakuptimta ku thuhet se “cilido vendim i Bashkimit Evropian, nuk e zhbën faktin që ato pasaporta vijojnë të mbeten ilegale”, sikur qenka qeveria e Kosovës që përcakton për BE-në se cilin dokument e konsideron ilegal e cilin jo.
Komunikata vazhdon duke e pranuar se vendimi është “në shkelje të plotë të integritetit territorial dhe sovranitetit të shtetit tonë, e rrjedhimisht të papranueshme për Republikën e Kosovës”, por pa treguar cilët janë hapat konkret të protestimit të këtij vendimi.
Më 6 mars, Komisioni për Punë të Brendshme në Parlamentin Evropian (PE) caktoi eurodeputetin slloven nga radhët e Aleancës së Socialistëve dhe Demokratëve (S&D), Matjaz Nemec, raportues për largimin e regjimit të vizave për serbët e Kosovës që posedojnë pasaporta ilegale.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com