DASH urdhëron largimin e familjeve të diplomatëve nga ambasada amerikane në Ukrainë

Departamenti i Shtetit ka urdhëruar largimin e të gjithë anëtarëve të familjes së personelit që shërben pranë ambasadës amerikane në Kiev.

Njoftimi zyrtar i autoriteteve amerikane erdhi të dielën e 23 janarit, duke përmendur si shkak “kërcënimin e aksionit ushtarak rus”.

Departamenti i tha gjithashtu stafit jothelbësor se ata mund të largohen nga vendi.

Ky vendim nënvizon frikën në rritje në Washington për një pushtim të afërt ushtarak të Ukrainës nga Moska.

Kjo, ndërsa grumbullon dhjetëra mijëra trupa ruse rreth kufijve të Ukrainës.

Atmosfera e paqëndrueshme është treguesi i fundit se përpjekjet për të mospërshkallëzuar krizën kanë dështuar pas bisedimeve midis Sekretarit të Shtetit, Antony Blinken dhe ministrit të Jashtëm rus Sergey Lavrov.

“Kushtet e sigurisë, veçanërisht përgjatë kufijve të Ukrainës, në Krimenë e pushtuar nga Rusia dhe në Ukrainën lindore të kontrolluar nga Rusia, janë të paparashikueshme dhe mund të përkeqësohen brenda një kohe të shkurtër”, nënvizon departamenti në deklaratë.

Ndërtimi i ngjarjes

Ambasada e Shteteve të Bashkuara në Kiev do të kërkonte më herët, nga DASH që të autorizonte largimin e të gjithë stafit jo-thelbësor dhe familjeve të tyre.

Ky lajm u raportua fillimisht nga gjiganti amerikan CNN dhe u njoftua më pas edhe nga e përditshmja britanike “The Guardian”.

Një zëdhënës i DASH-it nënvizoi se ata nuk kanë “asgjë për të deklaruar në këtë moment”.

“Ne kryejmë planifikim rigoroz të emergjencës, siç bëjmë gjithmonë, në rast se situata e sigurisë përkeqësohet”.

Një zëdhënës i ambasadës nuk pranoi të konfirmojë lajmin për CNN.

Një burim i afërt me qeverinë ukrainase i tha CNN ndërkaq se SHBA-të e kanë informuar Ukrainën se “ka gjasa të fillojë evakuimet që në fillim të javës së ardhshme”.

Burimi tha se presidenti ukrainas Volodymyr Zelensky ka folur me Sekretarin Amerikan të Shtetit Antony Blinken për këtë çështje.

Një zyrtar i DASH-it tha se departamenti nuk do të komentonte mbi diskutime private.

Sipas tij, vendimet për stafin jashtë shtetit bazohen në një kriter të vetëm – sigurinë e amerikanëve.

Vlerësimi i fundit i inteligjencës i ukrainase flet për më shumë se 127 mijë trupa të vendosura në rajon.

Zyrtarët amerikanë ende nuk e dinë se cilat janë planet e presidentit rus Vladimir Putin.

Disa prej tyre, sipas CNN, thonë se ka prova që Rusia po planifikon të marrë Kievin dhe të rrëzojë qeverinë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.