DASH: Shqipëria, bazë për krimin e organizuar

Departamenti Amerikan i Shtetit (DASH) në raportin e tij të fundit për strategjinë e Kontrollit të trafikut ndërkombëtar të lëndëve narkotike – i cili përfshin gjithashtu dhe një tjetër kapitull mbi pastrimin e parave  – e ka cilësuar Shqipërinë një vend burim të kanabisit, por jo vetëm.

Për DASH-in, Shqipëria është një bazë lokale për grupet e krimit të organizuar që lëvizin drogat e paligjshme nga vendet e origjinës në tregjet evropiane.

Në raport shpjegohet se si funksionon trafikimi.

“Kanabisi shqiptar dërgohet në Turqi dhe këmbehet me heroinë dhe kokainë, të cilat kontrabandohen nëpër Evropë nga trafikantët kombëtarë shqiptarë, të cilët vlerësohen se luajnë një rol të madh në trafikun ndërkombëtar të narkotikëve dhe rrjetet e krimit të organizuar”, shkruhet aty.

Gjithashtu, Shqipëria konsiderohet si një element kyç i rrugës ballkanike të trafikut të drogës në Evropën Perëndimore dhe në Mbretërinë e Bashkuar.

Ashtu siç është në dukje në raporte të tjera, theksohet se grupet shqiptare të krimit të organizuar janë të pranishme në Shtetet e Bashkuara, Britaninë e Madhe dhe në të gjithë Evropën, si dhe në Amerikën e Jugut, duke përfshirë Ekuadorin, Kolumbinë dhe Perunë.

Ata tashmë kryejnë disa funksione, atë të blerjes, transportit, shpërndarjes deri te zinxhiri i shitjeve në Evropë, Mbretërinë e Bashkuar dhe Shtetet e Bashkuara.

“Autoritetet shqiptare regjistruan një rritje të konfiskimeve të kokainës në Portin e Durrësit në vitin 2021, kryesisht në dërgesat e bananeve nga Ekuadori” dhe se “forcat shqiptare të rendit shqiptar morën pjesë në disa operacione të zbatimit të ligjit në shumë shtete në vitin 2021, me shtetas shqiptarë të arrestuar ndër të tjera në Greqi, Itali, Spanjë dhe Holandë”, shkruhet aty.

Nuk mund të mungonte edhe një vlerësim për Prokurorinë e Posaçme, SPAK.

“SPAK ka regjistruar disa suksese në vitin 2021, duke përfshirë arrestimin e 38 personave, përfshirë një prokuror dhe disa zyrtarë të lartë të policisë, si pjesë e një hetimi të madh ndërkombëtar për trafikun e lëndëve narkotike”.

Pastrimi i parave

Pastrimi i parave mbetet ende problem, ndonëse Qeveria ka bërë përparim drejt pengimit të pastrimit të parave gjatë vitit 2021.

Kjo pasi, pozicioni gjeografik i Shqipërisë dhe prania e rrjeteve shqiptare në krimin e organizuar në Evropën Perëndimore dhe Amerikën e Jugut e bëjnë atë edhe më të dobët.

Shqipëria, sipas raportit, “mbetet e pambrojtur ndaj pastrimit të parave për shkak të korrupsionit, pranisë së rrjeteve të krimit të organizuar dhe boshllëqeve në legjislacion dhe mbikëqyrje”.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.