Dallon pozicioni, dallon qëndrimi – Çfarë votoi sot VV e kundërshtonte fuqishëm në 2017 – çfarë kundërshton sot PDK fuqishëm, e kishte votuar në vitin 2017

Partia Demokratike e Kosovës është shumë e pakënaqur që pensioni i veteranit është ndarë nga paga minimal.

Kurse Lëvizja Vetëvendosje e ka votuar në lexim të parë projektligjin për pagën minimale që nuk e përfshinë pensionin e veteranit.

Duket e pabesueshme, por vetëm 5 vjet më parë, të dy këto parti kishin qëndrime krejtësisht të kundërta me veten sot.

Në vitin 2017 Partia Demokratike e Kosovës e kishte votuar ndryshim-plotësimin e Ligjit NR. 04/L -261 që e ndante pensionin e veteranit nga paga minimale. Kurse Lëvizja Vetëvendosje e kundërshtonte këtë ndarje dhe nuk kishte votuar ndryshimet dhe plotësimet e ligjit pikërisht për këtë arsye.

Në vitin 2014 në Ligjin për Veteranët, në nenin 18 të tij thuhej se “Lartësia e shumës së pensioneve varësisht nga mundësitë buxhetore, kostoja e jetesës dhe inflacioni eventual, në fund të çdo viti për vitin e ardhshëm, Qeveria e Kosovës me propozimin e Ministrisë së Financave me vendim të veçantë, mund të vendosë për lartësinë e shumës së pensionit të Veteranit Luftëtar të UÇK-së, cila nuk mund të jetë më e vogël se paga minimale e përcaktuar në Kosovë”.

Por, në vitin 2017, kur në qeveri ishte Partia Demokratike e Kosovës dhe Lidhja Demokratike e Kosovës ishte vendosur për Ndryshimin dhe Plotësimin e Ligjit 04/L -261 për Veteranët e Luftës së Ushtrisë Çlirimtare të Kosovës”.

Në këtë ndryshim-plotësim, në nenin pesë të tij, vendoset që “Neni 18 i ligjit bazik, fshihet”, pra pikërisht neni që lidhte pagën minimale me pensionin e veteranit.

Këtë fshirje Vetëvendosje e kishte kundërshtuar ashpër.

Vetë Xhelal Sveçla, sot ministër i Punëve të Brendshme nga Lëvizja Vetëvendosje, tregonte në një paraqitje të tij se si “ka pas kundërshtime të Lëvizjes Vetëvendosje për këtë ndryshim. Ne nuk e kemi votuar këtë ligj”.

Por, “koalicioni PDK-LDK kanë arritur pajtueshmëri që ky ligj të ndryshohet”.

Tani, derisa PDK bën zhurmë se si po anashkalohet veterani harron se e kishte bërë këtë anashkalim vetë në vitin 2017, kurse Lëvizja Vetëvendosje që atëherë kishte kundër kësaj ndarje të pagës minimale me pensionin e veteranit, tani e cilëson si absurd qëndrimin e vet paraprak.

Kryeministri i Kosovës, Albin Kurti, në një paraqitje të tij në KTV, thoshte se është e pakuptimtë të lidhet paga minimale me pensionin e veteranit.

Gjithsesi, kjo nuk është hera e parë dhe vështirë se do jetë e fundit, kur partitë politike në Kosovë do pësojnë metamorfoza të tilla.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.