Daçiq: Pa Rusinë, vështirë se mund ta shpëtojmë Kosovën

Kryetari i Kuvendit të Serbisë, njëherit edhe kryetar i Partisë Socialiste Serbe (SPS), Ivica Daçiç ende vazhdon të flas sikur të jetë në vitet e ’90-ta, ka thënë se pa Rusinë, Serbia e ka të vështirë të ruaj Kosovën, duke mos dashur të kuptoj realitetin e krijuar në Kosovë tash e mbi dy dekada.

Interesi parësor i Serbisë, sipas tij është të mbajë lidhje të forta me Moskën, sepse ajo mund të vërë veton ndaj Kosovës, për ta parandaluar që të bëhet anëtare e Organizatës së Kombeve të Bashkuara (OKB).

Kryeparlamentari serb, sa i përket moslejimit të mbajtjes së zgjedhjeve serbe në Kosovë me 3 prill, është shprehur i “tronditur”.

“Duhet të shmangim sjelljen irracionale dhe emocionale ndaj situatës aktuale”.

“Nëse jemi të gatshëm të heqim dorë nga Kosova, atëherë mund të vendosim sanksione ndaj Rusisë. Por nëse nuk jemi gati, atëherë nuk mundemi”, ka deklaruar ai.

Daçiç ka pyetur se si do ta mbrojmë Kosovën pa aleat?, në një intervistë për Tanjug.

“Ne kemi një aleat të ri. Sanksionet kundër Rusisë nuk do të dëmtojnë Rusinë, por Serbinë”, duke folur me cinizëm se Rusia “i mbijetoi” sanksioneve të Malit të Zi, andaj, ajo “do t’i mbijetonte edhe sanksioneve serbe”, ka thënë Daçiç.

Serbia është i vetmi vend i rajonit të Ballkanit Perëndimor që nuk ka vendosur sanksione ndaj invazionit rus mbi Ukrainën, kur të gjitha shtetet e tjera, përfshi edhe Republikën e Kosovës, kanë harmonizuar sanksionet me Bashkim Evropian dhe me Aleancën Veri Atlantike, NATO.

Krejt ky diskurs i Daçiçit, është brenda lojës së fushatës zgjedhore, duke bërë përpjekjet e fundit për të zgjuar ndjenjat nacionaliste për të kapur ndonjë votë më shumë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.