Çuçi-Kumbaro: Ndëshkim të ashpër për autorët e krimeve mjedisore

“Ndëshkim të ashpër për autorët e krimeve mjedisore. Moratoriumi i pyjeve dhe gjuetisë janë ende në fuqi”.

Kështu u shprehën ministri i Brendshëm, Bledi Çuçi, së bashku me ministren e Turizmit dhe Mjedisit, Mirela Kumbaron, të mërkurën e 10 nëntorit pas një takimi me drejtuesit e Policisë së Shtetit – qendrorë, vendorë dhe të kufirit.

Çuçi kërkoi nga strukturat policore klasifikimin e krimeve mjedisore, me të njëjtin prioritet si lufta ndaj krimit të organizuar, apo krimet ndaj jetës e pronës.

“Për çdo metër katror territor dhe dëmtim që ndodh në të, do të ketë përgjegjës dhe të punonjësve të policisë”, theksoi Ministri i Brendshëm.

Ai deklaroi i prerë se nuk do të ketë asnjë tolerim, por vetëm ndëshkim të ashpër ligjor për ndotje të mjedisit, prerje pyjesh apo dëmtim të lumenjve.

Nga ana tjetër Kumbaro nënvizoi se lufta ndaj krimeve mjedisore do të zhvendoset në një fazë të re, intensive.

“Përmes akteve ligjore, jemi duke hartuar me grupet e punës nga njëra anë dhe bashkëpunimit e koordinimit më të mirë në terren të strukturave të mjedisit, Inspektoriatit Kombëtar të Mjedisit dhe Territorit dhe Policisë së Shtetit”.

Ajo theksoi se, “në këtë angazhim do të ketë një rol më aktiv të Bashkive, si përgjegjëse për territorin, por roli i qeverisë qendrore do të jetë më i fortë në mbrojtjen e kujdesin ndaj mjedisit”.

Ndërsa në fjalën e tij Drejtori i Përgjithshëm i Policisë së Shtetit, Gledis Nano, u shpreh se Policia e Shtetit i ka të gjitha kapacitetet për të gjurmuar dhe ndëshkuar edhe këtë natyrë krimi.

“Aktualisht strukturat vendore të Policisë janë duke u angazhuar mbi disa plane masash, për mbrojtjen më të mirë të territorit, duke u ndalur tek ndërtimet pa leje, ndotjen e mjedisit apo dëmtimin e prerjen e pyjeve”, e mbylli Nano fjalën e tij.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.