Çuçi kujton të rënët në detyrë në 110-vjetorin e Policisë së Shtetit

Ministri i Brendshëm, Bledi Çuçi nderoi në 110-vjetorin e krijimit të Policisë Shtetit, me një mesazh të gjithë dëshmorët që ranë në krye të detyrës.

“Në këtë ditëlindje të organizatës që u krijua më pak se dy muaj nga themelimi i shtetit shqiptar, përulemi me respekt para të gjithë kontribuesve të saj ndër vite dhe ndaj dëshmorëve që ranë në krye të detyrës”, shkruan zyrtari shqiptar.

Ai shprehu mirënjohjen e tij për shërbimin dinjitoz që efektivët kanë bërë dhe po bëjnë për rendin e sigurinë publike, për të garantuar jetën dhe pronën e qytetarëve.

“Sot Policia e Shtetit është ndër institucionet më të besuara në vend dhe pavarësisht se krahasimet me të shkuarën janë si ‘nata me ditën’, sot është koha që ne të matemi me të ardhmen dhe të shfrytëzojmë të gjitha kapacitetet tona për të bërë një kapërcim epokal”, vëren Çuçi.

Zyrtari solli në vëmendje faktin se falë punës së Policisë së Shtetit, Shqipëria pati 30 për qind më pak vrasje dhe 13.5 për qind më pak aksidente, referuar statistikave institucionale.

“Rritja e pagave me 15 për qind, por edhe përfshirja në ndihmën e Pakos së Madhe, përbëjnë një mbështetje të konsiderueshme për zerimin e ndikimit të inflacionit të luftës në familjet e tyre”, shtoi ai.

Sipas tij, Shqipëria ka sot një polici moderne që qaset si shërbim ndaj qytetarëve dhe vizioni i autoriteteve është të vijojnë transformimin përmes investimeve në teknologji.

Historiku i Policisë së Shtetit shqiptar

Organizimi fillestar i Policisë u bë në bazë drejtorie me qendër në Vlorë, e drejtuar fillimisht nga gjakovari Halim Gostivari e më pas nga tepelenasi Fehmi Mezhgorani.

Në vitet 1919-1920, qeveria vlerësoi rëndësinë e Policisë, organizoi Drejtorinë e Përgjithshme të Qetësisë Botore dhe u dha kompetenca nënprefekturave e prefekturave që të organizojnë zyrat e Policisë dhe të caktojnë policët në detyrë. Strukturat e Policisë Vendore u shtrinë në 14 nënprefektura, me efektiv 5 komisarë, 8 nënkomisarë, 43 policë dhe u emërtuan “komiseri”.

Viti 1920 solli riorganizimin e Policisë me drejtori policie në prefektura dhe shtimin e limitit organik të saj, duke promovuar në detyra shumë drejtorë dhe komisarë policie, shumë prej të cilëve vinin nga administratorë vendorë apo drejtues në strukturat e xhandarmërisë ose ushtrisë/milicisë.

Në vitin 1921 roli i Policisë u fuqizua dhe iu kushtua kujdes i posaçëm i aftësimit për kryerjen e veprimeve proceduriale që në çastin e njoftimit për ngjarjen, ndjekjen me shumë përgjegjësi të ngjarjeve kriminale dhe dokumentimin rigoroz të tyre në një raport në çdo dy javë.

Kontrolli i territorit vlerësohej detyrë e rëndësishme dhe në metodën e policimit u kufizua e drejta e veprimit arbitrarisht ndaj individëve.

Në vitin 1927 dhe 1928 kemi përpjekje për organizimin e Policisë sipas modelit italian dhe në zbatim të ligjit për Administratën Civile, duke synuar dhënien e të gjithë kompetencave prefektit për kontrollin e policisë.

Periudha 1939-1944 ishte në peshën e Luftës së Dytë Botërore dhe Policia në më të shumtën ishte strukturë e qetësisë në rrethana specifike që sjell lufta.

Fillimisht ajo ishte pjesë e trupës së armatosur e Policisë në Shqipëri, në varësi të kryesisë së Këshillit të Ministrave, por e inkuadruar në trupën policore të Mbretërisë së Italisë.

Në strukturën organizatave të saj spikatin Drejtoria Qendrore e Sigurimit Publik, zyrat e prefekturave, zyrat në nënprefektura dhe zyrat e kufirit dhe të post-porteve tokësore e detare.

Kjo polici ishte në mbikëqyrjen e këshilltarit të përhershëm të policisë italiane dhe shumë funksionarëve të tjerë italianë.

Duhet shtuar se pati fuqizim të policisë dhe rritje të gamës së përgjegjësive të saj.

Çlirimi nga pushtimi nazi-fashit i vendit solli politika të reja në misionin e policisë. Bërthamat e njësive policore të krijuara në zonat e çliruara gjatë luftës ishin të gatshme të merrnin përgjegjësinë e mbajtjes së qetësisë në vend.

Në maj 1945 mori jetë dokumenti zyrtar për organizimin e ri të policisë, kur u riorganizuan strukturat ushtarake të komandave të qarqeve dhe u krijua Policia Popullore.

Policia Popullore ishte strukturë e MPB, varej nga Drejtoria e saj dhe në periudhën 1946-1948 limiti organik ka variuar nga 2 mijë e 286 vetë në 3 mijë e 766 vetë.

Deri në vitin 1982 limiti organik i Policisë së Shtetit ka qenë përafërsisht në këto shifra, ndërsa zhvillimet ndërkombëtare dhe ato të brendshme ndikuan në rritjen e limit organik të Policisë aq sa në vitin 1991 shifra e punonjësve të rendit e të qetësisë arriti në kufijtë deri 21 mijë punonjës.

Në fillimin e këtyre viteve kanë zanafillën krijimin e strukturave të forcave speciale, shtimi i masave të shumta të sigurisë për VIP-at dhe sidomos rritja e numrit të policisë kufitare.

Periudha 1992 e në vijim u shoqërua me reformimim e strukturave, personelit, standarteve të policimit dhe përmirësimin e ndjeshëm të infrastrukturës.

Policia Shqiptare ka vite që është krahas policive moderne evropiane, e barabartë dhe në frontin e përbashkët kundër krimit.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.