Ndonëse rruga iu imponua nga rrethanat, e çoi në famë botërore.
Izet Curi, është i lindur në Dremjak të Hanit të Elezit dhe më pas lëvizi për në Shkup.
Ai është një kreator i modës që mësoi të qepte qëkur ishte 15 vjet.
Kjo nuk ka qenë ëndrra e tij e fëmijërisë, në një bisedë për Albanian Post, ai ka shpalosur copëza të historisë së tij, unike dhe shumë frymëzuese.
Fëmijërinë ai e kujton si një periudhë të lumtur, ishin shumë fëmijë e kishte shumë dashuri.
“Jam prej një familje nëntë fëmijë, babai ynë ka vdekur kur kam qenë i vogël, kur i kam pasur 14 vjet. Nëna ime, na ka dirigjuar nga zanati, sa më shpejt me qenë të pavarur na thoshte”, ka treguar Curi.
Ai shpjegon se si rrodhi ngjarja që ai mori gjilpërën e perin në duar e filloi të mësonte.
“Pra, në 1963 kur ka ndodhur tërmeti në Shkup atëherë prindërit na kanë dërguar të marrim një zanat diçka. Pastaj, unë gjithmonë kam qenë i kujdesshëm nga ana e rrobave. Nëna ime çka m’i ka dhënë rrobat e vëllait tim nuk isha i kënaqur. Ajo më pati thënë ke me shku me marr zanatin dhe pastaj i qep për vete si të duash”, ka potencuar ai.
Që nga fëmijëria përherë e kërkonte të përsosurën. Përkushtohej pafund derisa të arrinte rezultatin që ai donte.
Bashkë me motrat e tij u bënë shpejt të njohur.
“U bëmë njëfarë sipërmarrje, si shembull, ka qenë një periudhë shumë e bukur sepse kemi punuar të gjithë bashkë”, shtoi kreatori i modës.
Madje, ai filloi edhe të qep rroba për këngëtarët e muzikës rock në moshë fare të re.
Më tej, përmendi edhe mjeshtrin e tij në Shkup, nga i cili mësoi shumë.
“Pasi unë diplomova mandej me një bashkëpunëtor vendosëm ta hapim një dyqan”, tha ai.
Pas kësaj, ai vendosi të shkonte në Paris për të blerë gjërat që iu nevojiteshin për punën, por edhe të shoh nga afër se si vibron qyteti i modës.
“Kam ardhur për dy javë në Paris e u bënë 54 vjet që jam në Paris”, ka theksuar Curi.
Modelisti, rrëfeu se si mezi ia dha lajmin nënës së tij se nuk do të kthehej më në Kosovë.
“Për mua ka qenë shumë zor me i tregu nënës time që unë nuk po vij. Gjashtë muaj s’kam ditur si t’i them. Nëna ime e ka pasur inat, nuk e ka dashur këtë”, tha ai.
Pavarësisht kësaj, ai theksoi se ka vepruar ashtu siç ka menduar që për të është më e mira.
Ky udhëtim edhe pse ishte planifikuar të ishte i shkurtër, rezultoi t’i sjellë famë botërore në moshën 22 vjeçare.
Meqë nuk e dinte gjuhën, kur kërkonte punë, përmes mjeteve të qepjes tentonte që të shpjegonte punën që bënte.
Mundësia që i erdhi do t’i ndryshonte përgjithmonë jetën e tij.
“Kur u ndala unë në Francë, shkova në Ambasadë të Jugosllavisë, por në atë kohë viteve të 60-ta shumica kanë qenë prej Jugosllavisë edhe ato kanë pasur punëtori të veta ata më çuan te një jugosllav”, ka thënë tutje.
Pastaj, puna e tij i ngjalli kuriozitet njërës prej shtëpive më të njohura të modës, ‘Hermesit’.
“Ajo shtëpia ku më kanë çuar këta ajo ka punuar për Hermesin edhe mandej modelet që i qepnim i ka vërejtur dikush atje te Hermesi kanë ardhur të interesohen kush i ka qepur edhe ata më kanë propozuar që të punoj te ta”, potencoi për AP.
Kur shkeli në hapësirat e kësaj shtëpie kishte ndjenja të përziera e frikë.
“Në atë moment kur jam futur në atelie te Hermesi jam trembur shumë. Kur i kam parë ato vitrina që unë as ëndërr nuk i kam parë as nuk kam imagjinuar që ekzistojnë, mirëpo kur jam futur në atelie e kam parë që është peri, gjilpëra gërshërë, metra, e njëjta gjë sikur çka kam pasur unë“, deklaroi Curi.
Puna aty i mundësoi njohjen me persona shumë të njohur në fushën e modës e më gjerë me të cilët edhe bashkëpunoi.
Më vonë ai theksoi se “unë e kam lënë Hermesin që të shkoj të punoj me Thierry Mugler sepse ai është një nga avangardistët më të mëdhenj të modës.”
Pas këtij bashkëpunimi, punoi edhe me Azzedine Alaia, të cilin e konsideroi si një profesionist të fushës.
Ai ka punuar edhe në shtëpi të tjera të modës, po ashtu për një kohë ishte ligjërues edhe në tri nga fakultetet më të mëdha në Francë.
Fakultetin e parë të modës në Kosovë thotë se e themeloi, në vitin 2004, në një kohë kur tregon se për nuk flitej shumë për të.
E tash gjithë angazhimin e tij ia dedikon Shkupit ngase ka 10 vjet që aty ka hapur Institutin Internacional të Modës “Izet Curi”.
Ai ndjehet krenar me studentët e tij të cilët tregon se kanë prodhuar suksese të mëdha ndërkombëtarisht e shumë prej tyre potencon se janë të angazhuar në shtëpi të njohura të modës nëpër botë.
Studentët e tij dëshiron t’i shoh sa më lart, ata thotë se kanë punuar shumë dhe vazhdojnë njësoj.
“Kosova do të krenohet me ta. Ata tash i bëjnë gjërat më mirë se unë, por i kanë bazat e kanë marr pak atë inatin tim, ja mirë ja hiç”, theksoi më tej.
U deshtën shumë orë punë, mungesa të shumta për të arritur këtë sukses.
“Punë, punë vetëm punë. Kam punuar në vikend, në festa, 15-16 orë në ditë krejt jetën. Sot fëmijët e mi që janë rritur më thonë mua mos na përmend modën se kurrë te shtëpia nuk ke qenë”, tregoi për AP.
Por, kur je i pasionuar kështu ndodhë, s’ka se si të jetë ndryshe thotë ai.
Modelisti Curi, thotë se nuk është e lehtë të plotësosh kërkesat që vijnë, duhet punë e përgjegjshmëri ndaj njerëzve.
Ai këshillon të rinjtë të jenë pa komplekse, të luftojnë fuqishëm, të këmbëngulin, të marrin seriozisht gjërat që duan t’i realizojnë dhe të mos iu largohen atyre.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
