Conference League/ Roma dhe Basel-i për vendin e parë në grup, Union Berlin-i me një këmbë jashtë

UEFA Conference League do të luajë ndeshjet e fundit të fazës së grupeve këtë të enjte. Janë 15 sfida që do të luhen duke filluar nga ora 18:45 (ato në grupet A, B, C dhe D) dhe nga ora 21:00 (ato në grupet E, F, G dhe H).

Faktikisht duhet të luheshin 16 sfida, por ndeshja midis Tottenham-it dhe Rennes-it është shtyrë për shkak të shpërthimit të rasteve me koronavirus te anglezët.

Grupi A: Alashkert-i përballet me Maccabi Tel Aviv-in. Vendasit janë të eleminuar tashmë, ndërsa miqtë janë kualifikuar për në raundin tjetër.

LASK-u përballet me HJK-në. Vendasit nga Austria e kanë siguruar biletën për në raundin tjetër të Conference League-s.

Grupi B: Partizan-i i Beogradit do të përballet me Anorthosis Famagusta-n. Të dy ekipeve u nevojitet fitorja për të kaluar në raundin tjetër.

Gent-i pret Flora Tallinn-in. Vendasit janë të kualifikuar, ndërsa miqëve u nevojitet fitorja për të kaluar në raundin tjetër.

Grupi C: Roma përballet në transfertë me CSKA Sofia-n. Skuadra e Jose Mourinho-s është e kualifikuar për në raundin tjetër, por do të tentojë fitoren për të kapur vendin e parë në grup.

Vendi i parë mbahet aktualisht nga Bodo/Glimt-i. Norvegjezët përballen në transfertë me Zorya Luhansk-un.

Grupi D: AZ Alkmaar-i i kualifikuar tashmë, përballet me Randers-in. Danezët janë në vendin e dytë dhe u nevojtet fitorja për të mos pasur surpriza.

Dueli tjetër i këtij grupi luhet midis CFR Cluj-it dhe Jablonec-it. Miqëve u duhet fitorja dhe të shpresojnë që Randers-i të mos fitojë, për të kaluar në raundin tjetër.

Grupi E: Union Berlin-i do të ketë shansin e fundit për një biletë në raundin tjetër të Conference League-s. Përballë do të ketë Slavia Praha-n. Miqtë renditen të dytët në grup dhe gjermanët të tretët. Për çekët mjafton dhe barazimi për të kaluar më tej.

Feyenoord-i i kualifikuar tashmë, përballet me izraelitët e Maccabi Haifa-s. Për miqtë nuk ka asnjë shans për të kaluar në raundin tjetër.

Grupi F: Kobenhavn-i pret Slovan Bratislava-n. Danezët janë kualifikuar për në raundin tjetër. Sllovakëve u duhet fitorja, për të mos mbetur jashtë raundit tjetër, pasi PAOK-u që ka pikë të barabarta me ta, ndeshet me modestët e Lincoln Red-it.

Grupi G: Vitesse do të përballet me Mura-n. Për vendasit ka një shpresë për kualifikim nëse fitojnë Miqtë janë të eleminuar tashmë.

Ndeshja tjetër e këtij grupi është ajo mes Tottenham-it dhe Rennes-it. Sfida është shtyrë për një afat të pacaktuar. Francezët janë të kualifikuar në raundin tjetër.

Anglezëve u duhet fitorja për të kaluar në raundin tjetër, por vetëm nëse fitojnë holandezët e Vitesse-s. Në të kundërt kalojnë me çdo lloj rezultati.

Grupi H: Basel-i përballet me Qarabag-un. Të dy skuadrat janë të kualifikuara për në raundin tjetër. Ndeshja vlen vetëm për të përcaktuar se cila prej tyre do të përfundojë si kokë grupi.

Sfida tjetër do të jetë mes Omonia Nicosia-s dhe Kairat Almaty-t. Ndeshja vlen vetëm për statistikë, pasi të dy skuadrat janë të eleminuara tashmë.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.