Televizioni amerikan CNN ka raportuar se patrullimet e trupave të KFOR-it në pikëkalimet kufitare në Jarinje dhe Bërnjak janë shtuar në masë të madhe dhe se janë diku 5 mijë ushtarë që janë vendosur në zonën e Veriut dhe ku pritet që njësitet speciale të zëvendësohen me ushtarët e kësaj force.

Pamjet nga vendi i ngjarjes tregojnë automjetet e NATO-s që lëvizin pranë barrikadave të bëra nga kamionë dhe automjete të tjera në kufirin Kosovë- Serbi.

Serbët nga veriu i Kosovës kanë bllokuar dy rrugë kryesore që kur ndalimi i targave hyri në fuqi të hënën javën e kaluar, duke përkeqësuar tensionet midis dy vendeve dhe duke bërë thirrje për qetësi nga NATO dhe Bashkimi Evropian.

Në bazë të ndalimit, të gjithë shoferët nga Serbia tani duhet të përdorin tabela të regjistrimit të përkohshme që janë të vlefshme për 60 ditë.

Më 27 shtator, Zyra për media e KFOR-it ka njoftuar se kanë marrë hapa të mëtutjeshëm në terren, duke i shtuar patrullimet përgjatë rrugëve kryesore të prekura nga bllokimet e protestuesve serbë dhe ka vendosur njësitet e veta edhe në pikat kufitare në Jarinjë e Bërnjak, në përputhje me mandatin që ka.

Sipas njoftimit për media të KFOR-it, “masat e marra, që janë biseduar paraprakisht me institucionet e Kosovës dhe kryetarët e komunave veriore, kanë qëllim deeskalimin e shpejt të situatës”.

Çështja e targave është e rregulluar me Marrëveshjen e Brukselit për lëvizjen e lirë, në kuadër të dialogut ndërmjet Kosovës dhe Serbisë, ku ishte përcaktuar që të gjithë pronarët e veturave që banojnë në Kosovë, duhet të përdorin targat ‘RKS’ (Republika e Kosovës) dhe kështu t’i hiqnin nga përdorimi targat që për serbët e Kosovës lëshoheshin nga Ministria e Punëve të Brendshme e Serbisë.