Çmimi i Suksesit: Lufta për emrin mes Riana-s nga Kosova dhe Rihanna-s nga Hollywood-i

Dy kosovare, disenjatore mode, ranë në radarin e superyllit global Rihanna, por jo për çfarë do të donin.

Rrëfimi interesant i ballafaqimit të Floriana Binakut dhe Rita Hoxhës është shpalosur ekskluzivisht për Albanian Post.

Gjithçka do të fillonte kur Floriana Binaku, 27-vjeçe, shqiptare nga Kosova që jeton në Zvicër, dhe Rita Hoxha, 26-vjeçe nga Prishtina, hapën një biznes online rrobash.

Emrin ia vendosën “Riana Atelier”.

Më pak për shkak të emrit e më shumë për shkak të cilësisë së veshjeve ato korrën sukses shpejt.

“Riana Atelier” filloi të gugllohej shumë dhe shpesh. Kërkesa u bë e pamundur të përballohej online, prandaj hapja e një dyqani fizik u shndërrua në urgjencë.

Ato vendosën ta hapnin një studio në Cyrih të Zvicrës.

Kur filluan procedurat për regjistrimin e biznesit të ri – aplikimi rezultoi me një përgjigje që përmbante ankesë.

Emri i përzgjedhur i dyshes, shpejt kishte rënë nën radarin e ekipit të yllit të muzikës pop, Rihanna.

Ekipi ligjor i Rihanna-s kërkoi ndalimin e përdorimit të emrit “Riana Atelier”.

Sipas tyre, kishte shumë ngjashmëri me emrin e këngëtares së hitit “Umbrella”.

Ndryshimi i emrit tanimë ishte i pashmangshëm, në të kundërtën disnjeatoret do të përballeshin me situatën e krijuar duke u ndeshur ligjërisht me ekipin e Rihanna-s.

Në fakt, siç tregon Rita për Albanian Post, emri s’kishte të bënte fare me këngëtaren nga Barbadosi.

“Bashkëkrijova emrin tim, Rita dhe emrin e partneres time Jana, për të krijuar markën tonë të quajtur ‘Riana Atelier’”, fillon shpjegimin Rita.

“Pasi pamë rritjen e dukshme të markës sonë, vendosëm të regjistrojmë biznesin tonë në Cyrih dhe të hapim studion tonë të parë”.

Meqë Rihanna ankohej, “Riana Atelier” u desh të shndërrohej në “Anari Atelier”.

Rita thotë se “duhej ndërrimi i emrit ose do merrnin hapa të rëndësishëm ligjorë”.

Dhe, “për një markë fillestare (si ne), vendimi për të vazhduar me emrin tonë dhe masat ligjore ishte hap i rrezikshëm”.

Por, rrezik kishte edhe në anën tjetër. Siç e sqaron Rita, “me ndërrimin e emrit, kishim frikë se shkaktohen dëme duke marrë parasysh se ‘Riana Atelier’ u bë mjaftë e njohur”.

Në tërë këtë kaos ato menduan të përdorin logjikën e emrit të parë për të prodhuar një emër të ndryshëm.

“Përdorëm emrin ‘Anari Atelier’, duke e lidhur atë prapë me emrat tanë, Rita dhe Jana”.

Fatmirësisht, problemi me emrin dhe ekipin e Rihanna-s nuk ka ndikuar në demotivin e dyshes së stilisteve, pasi që ato vazhduan të realizojnë planet e menduara mbi zhvillim të biznesit.

“Puna jonë intensive nisi për të krijuar një koleksion të ri të veshjeve, të cilat sipas mendimit tonë do t’i rezistonin gjithmonë trendeve të ardhshme dhe do të na çonin drejt niveleve më të larta. Koleksionin e emëruam ‘Renèe’ (reborn) duke interpretuar emrin si një simbol rilindjeje”, përfundoi ajo.

Në anën tjetër, Rihanna së fundmi ka pushtuar titujt e mediave ndërkombëtare, pasi është bërë nënë për herë të dytë nga lidhja e saj me rep artistin, ASAP Rocky.

Ylli i hitit “Love on the brain” ka sjellë në jetë një djalë, emrin e të cilit nuk e ka zbuluar, veç se thuhet, se fillon me shkronjën “R”, ashtu si vëllai i madh, RZA.

Rihanna, 35 vjeçe, e mbajti të fshehtë shtatzëninë deri në shfaqjen e saj të pjesës së parë në “Super Bowl” në shkurt të vitit 2023.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.