Historiani dhe studiuesi i lartë në Institutin Leibniz të Evropës Lindore dhe Juglindore (IOS) në Regensburg të Gjermanisë, Konrad Clewing, beson se Kosova në raport me Këshillin e Evropës ka bërë shumë gabime, meqë gabimisht mendoi se Franca, Italia e Gjermania do të ndihmonin në minutën e fundit.

Çështja e anëtarësimit të Kosovës në Këshillin e Evropës nuk u trajtua në mbledhjen e Komitetit të Ministrave më 17 maj, pasi tre fuqitë e mëdha të BE-së e kushtëzuan Kosovën me formimin e Asociacionit të Komunave me Shumicë Serbe.

Sipas Clewing Kosova nuk është dashur të mendoi se çështja e Asociacionit do të zgjidhet vetvetiu.

Në vlerësimin e tij kjo qasje është naive dhe një gabim i madh politik.

“Kjo u dha hapësirë aktorëve perëndimorë – nga Lajçak deri te liderët në Berlin, Paris dhe Romë – për të ndërhyrë. Parakushti për të paraqitur planin e Lajçak në Gjykatën Kushtetuese ishte një ndërhyrje që meriton kritikë. Letra e tre liderëve drejtuar Kurtit më 15 maj ishte gjithashtu shumë e ashpër. Megjithatë: Nëse qeveria do të kishte vepruar më herët, kjo mund të ishte shmangur”, ka thënë ai në një intervistë për rrjetin gjerman të lajmeve, DW.

Pak ditë pasi Kosova kuptoi se mbeti jashtë agjendës së KiE-së Qeveria e Kosovës, njoftoi se ka vendosur ta dërgojë një draft-statut për Asociacionin në Kushtetuese brenda majit.

Për Clewing kjo qasje është e pakuptueshme.

“Është e pakuptueshme se si mund të besohej se në minutën e fundit Gjermania, Franca ose Italia dhe gjithë QUINT do të ndryshonin mendjen dhe të pranonin një plan ende të papërfunduar si ai i Fondacionit FES”, shton ai.

Sipas tij është një “shenjë e keqe” që presidentja e Kosovës, Vjosa Osmani, nuk u konsultua për hapin e rëndësishëm të ministres së Jashtme, Donika Gërvalla.

“Është gjithashtu një shenjë e keqe që shumica qeverisëse në parlament ka pak ekspertizë ndërkombëtare. Por është e qartë: Përgjegjësia kryesore për mungesën e përgatitjes së një plani për Asociacionin dhe për prezantimin e dobët të qëndrimeve te partnerët është e qeverisë. Pra, te Ministria e Jashtme dhe kryeministri. Nëse kanë kontribuar këshilltarë të jashtëm, mund të thuhet se nuk bënë një punë të mirë. Por përgjegjësia kryesore për rezultatin e dobët është te qeveria”.