Gjenerali i pensionuar amerikan, Wesley Clark, i cili ka udhëhequr fushatën ajrore të NATO-s kundër caqeve ushtarako-policore serbe më 1999, do të qëndrojë për vizitë në Kosovë, ku do të takohet me Kryetarin e Lidhjes Demokratike të Kosovës (LDK), Lumir Abdixhiku.
Sic ka njoftuar LDK-ja, Abdixhiku do t’i ndajë Clark-ut dekoratën “Dr. Ibrahim Rugova”.
“Nesër (e diel), në orën 09:00, në Selinë Qendrore, kryetari i LDK-së me bashkëpunëtorë pret në takim Gjeneral Wesley Clark. Kryetari Abdixhiku po ashtu Gjeneralit Clark i ndan Dekoratën dr. Ibrahim Rugova, për rolin historik dhe kontributin e tij për çlirimin e Kosovës”, thuhet në njoftim.
Ndryshe, Wesley Clark, ka shërbyer si Komandant Suprem i Aleatëve në Evropë i NATO-s nga viti 1997 deri në vitin 2000.
Ai ka komanduar operacionin e Aleancës gjatë luftës në Kosovë, përkatësisht në bombardimin e Serbisë.
Clark është një nga gjeneralët më të dekoruar amerikanë, i cili ka shërbyer në radhët e ushtrisë amerikane për plotë 34 vjet.