![](https://albanianpost.com/wp-content/uploads/2023/09/Vlora-Citaku.jpg)
Sekretarja e përgjithshme e Partisë Demokratike të Kosovës, Vlora Çitaku, deklaroi se kryeministri i Kosovës, Albin Kurti, është duke e vazhduar vallen e përçarjes së shqiptarëve në Ballkan.
Çitaku, përmes një shkrimi në rrjetin social ‘Facebook’, ka shkruar se tash përveç Shqipërisë e Maqedonisë së Veriut, Kurti ka nisur takimin me partinë e vetme elektorale të Luginës.
“Pas ndërhyrjes në zgjedhjet e Shqipërisë e Maqedonisë së Veriut, sot paska takim elektoral me vetëm një parti politike të Luginës. Në vend se të përpiqet t’i unifikojë ata, siç kishte bërë Shqipëria në zgjedhjet e fundit, Kurti po i fryen zjarrit të ndasive mes vëllezërve dhe motrave tona në Luginë”, ka shkruar ajo.
Sipas saj, sjelljet e Kurtit në këtë drejtim janë të pakuptueshme.
“Nuk kam arritur ende të ia kuptoj entuziazmin Kurtit për përçarje e ndasi – por kjo gjë nuk ka sjellë asnjëherë diçka në dobi të shqiptarëve”.
“I papërgjegjshëm deri në ekstrem”.
Pasi ndërhyri në zgjedhje në Shqipëri dhe Maqedoni të Veriut, kryeministri Albin Kurti tash ka vendosur të përfshihet edhe në zgjedhjet lokale në Serbi që priten të mbahen këtë të diele të 2 qershorit, duke e përkrahur në garën për kryetare të Preshevës, këshilltaren e tij Ardita Sinanin dhe Ragmi Mustafin, kandidat për kryetar të Bujanocit, gjithashtu këshilltar i zëvendëskryeministrit Besnik Bislimit.
Madje, kryeministri Kurti do të mbajë një fjalim në një tubim parazgjedhor në amfiteatrin e Fakultetit Juridik në Prishtinë, i cili do të mbahet këtë të mërkurë në orën 18:00 e ku do të jenë prezentë Sinani, Mustafi, por edhe deputeti i vetëm shqiptar i Kuvendit të Serbisë, Shaip Kamberi.
Ndryshe, shqiptarët në Serbi janë pakicat e katërt kombëtare, sipas regjistrimit të fundit të popullsisë të vitit 2022. Në këtë shtet jetojnë 61.687 shqiptarë.
Partitë politikë dhe banorët shqiptarë shpesh janë ankuar se autoritetet serbe po e ulin numrin e shqiptarëve që jetojnë në Serbi, përmes pasivizimit të adresave të tyre.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com