Sipas nënkryetares së Partisë Demokratike të Kosovës (PDK), Vlora Çitaku, kryeministri Albin Kurti, dhe eksponentë të Lëvizjes Vetëvendosje vazhdojnë të krijojnë kriza dhe konflikte me aleatët, pasi që, siç vlerëson ajo, për t’i lënë në hije skandalet e brendshme.
“Kacafytjet e tyre publike herë me SHBA-në, herë me BE-në u kanë sjellur vetëm një të mirë. Po ua lënë në hije skandalet e njëpasnjëshme në qeverisjen e brendshme”, shkroi Çitaku në Facebook.
“Dje një zyrtar i VV-së u emërua drejtor i KEK-ut. Kjo pas arrestimit të ish Drejtorit, i cili po ashtu ka qenë zyrtar i VV-së”, shtoi.
Tashmë, në prizmin e nënkryetares së PDK-së, është e qartë, përplasjet me aleatët, në emër të sovranitetit, “po bëhen për të kompensuar mungesën e sukseseve në qeverisje , dhe për të mbuluar skandalet”.
“Nuk do të ketë jetë të gjatë kjo mendësi”, përfundoi ajo.
Ndryshe, të enjten, Korporata Energjetike e Kosovës (KEK), ka emëruar kryeshef të ri të kësaj kompanie Bekir Gërgurin, i cili ka qenë edhe kandidat i Lëvizjes Vetëvendosje (LVV), për asamble komunale në Obiliq.
Emërimi i eksponentit të VV-së në krye të KEK-ut, ka ardhur pasi që Nagip Krasniqi – po ashtu zyrtar i VV-së – ishte pezulluar nga kjo pozitë, pasi që po akuzohet për keqpërdorim me tendera.
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
