Çitaku kërkon nga Qeveria që të ndalojnë edhe kontratat një burimore e shkeljet e Kushtetutës

Nënkryetarja e Partisë Demokratike të Kosovës, Vlora Çitaku, ka kërkuar nga Qeveria e Kosovës që pas ndalimit të platformës ‘TikTok’ në të gjitha institucionet e Kosovës, të ndalohen edhe veprimet e tjera joligjore të pushtetit të udhëhequr nga kryeministri Albin Kurti.

“Ndalohet TikTok-u në të gjitha institucionet e Republikës së Kosovës. Lajm i mirë ky”.

“Me këtë harxh, ndaloni edhe kontratat njëburimore, shkeljet serike të Kushtetutës, subvencionet për familjarë, etj etj”, ka shkruar Çitaku në rrjetin social ‘Facebook’.

Më 29 qershor, për të nëntën herë me radhë, Gjykata Kushtetuese konstatoi se Qeveria e Kosovës kishte shkelur Kushtetutën.

Kësaj here shkeljet janë gjetur në 7 nene në Ligjin për Këshillin e Pavarur Mbikëqyrës për Shërbimin Civil, kështu duke rrëzuar nenet 2,6,7,8,9,10 dhe 11, i cili ishte dërguar për shqyrtim nga deputetët e Partisë Demokratike të Kosovës (PDK) dhe Lidhjes Demokratike të Kosovës (LDK).

Vetëm për dy ditë, gjykata konstatoi shkelje edhe në dy vendime të tjera të Qeverisë – njëri për shkarkimin e anëtarit të Organit Shqyrtues së Prokurimit, e tjetri për Ligjin për Byronë Shtetërore për Verfikimin dhe Konfiskimin e Pasurisë së Pajustifikueshme.

Tre vendimet e fundit e bënë qeverisjen Kurti si pushtetin që ka më së shumti shkelje të aktit më të lartë juridik në vend që nga paslufta.

Këto shkelje të vazhdueshme po vlerësohet se po ndodhin për shkak se pushteti po i përgatit këto ligje në mënyrë të gabueshme.

Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.