Këtë të martë në Nion të Zvicrës u hodh shorti për përcaktimin e çifteve të raundit të parë kualifikus në UEFA Champions League 2024-25. Në këtë fazë marrin pjesë katër ekipe shqiptare, Egantia, Ballkani, Decici dhe Struga.
Katër skuadrat shqiptare, përkatësisht Egnatia, kampione e Shqipërisë, Ballkani, kampion i Kosovës, Struga, kampione e Maqedonisë së Veriut, dhe Decic, kampion në Mal të Zi, kanë mësuar rivalët në raundin e parë kualifikues të Champions League.
Struga ishte skuadra e parë shqiptare që u nxorr nga shorti dhe fati nuk ishte me ta teksa goglat i vunë përballë kampionit të Sllovakisë, Slovan Bratisllavës.
Më tej, Decic, skuadra nga Tuzi që u shpall kampione për herë të parë në Malin e Zi sezonin e fundit, u vendos të përballet me ekipin kampion nga Uellsi të The New Saints.
Egnatia do të duhet të bëjë një udhëtim ballkanik në këtë fazë të turneut, pasi goglat e vendosën përballë skuadrës nga Bosnje-Hercegovina të Borac Banja Luka.
Ballkani do të ketë përballë skuadrën kampione të Andorrës, UE Santa Coloma.
Por, cilët janë në thelb kundërshtarët e ekipeve shqiptare?
Sigurisht, emri më i degjuar është ai i Slovan Bratisllavës. Skuadra kampione e Sllovakisë dhe një nga më të njohurat në Evropë, ndonese jo me një skuadër e niveleve më të larta.
Slovan Bratislava u krijua ne vitin 1919 dhe mbahet mend si skuadra që mundi Barcelona-n në vitin 1969 në finalen e Cup Winners’ Cup në Bazel. Klubi gjithashtu furnizoi me shtatë lojtarë ekipin fitimtar të UEFA Euro 1976, Çekosllovakinë famshme.
Ata janë tetë herë kampion të Çekosllovakisë, 14 herë kampion të Sllovakisë dhe 10 herë fitues të Kupës së Sllovakisë.
Sipas “Transfermarkt” vlera e skuadrës shkon në rreth 20 milionë euro. Ata kanë dy lojtarë me Kombëtaren sllovake në Euro 2024.
The New Saints është një tjetër emër i dëgjuar kur flitet për nivelet më të ulëta në kompeticionet Evropiane, pra jo fazën e grupeve apo më tej. Dhe, është një ekip anglezo-uellsian pasi shtrihet mes dy qyteteve kufitare Llansantffraid në Uells dhe Oswestry në Angli.
Që nga sezoni 2001–02, ata kanë përfunduar si kampionë (16 herë) ose nënkampionë në çdo sezon, përveç sezonit 2008–09, ku përfunduan në vendin e tretë në ligë.
Vlera e skuadrës shkon në rreth 2.8 milionë euro sipas “Transfermarkt”.
Borac Banja Luka vjen nga një zonë në Republikën Srpska në Bosnje-Hercegovinë dhe u themelua më 4 korrik 1926.
Pas bashkimit të tre ligave në Bosnje-Hercegovinë në vitin 2002, Borac, i cili më herët kishte dominuar në kupat e zhvilluara në Republikën Srpska, ka fituar tre kampionate dhe një kup.
Vlera e përgjithshme e ekipit të Borac Banja Luka sipas “Transfermarkt” shkon në rreth 7.4 milionë euro.
UE Santa Coloma është rivali më i dobët nga kundërshtarët e ekipeve shqiptare. Ekipi nga Andorra do të përballet me kampionët e Kosovës, Ballkanin.
Klubi u themelua më 23 shtator 1986 në fshatin Santa Coloma, Andorrë. Ekipi i parë i futbollit u rithemelua, pasi ishte joaktiv për shumë vite, në vitin 2006 duke iu bashkuar ligës së futbollit Andorran Segona Divisio vitin e ardhshëm.
Skuadra luan në Primera Divisio pasi fitoi Segona Divisio në sezonin 2007–08. Klubi bëri paraqitjen e tij të parë në garat evropiane në kualifikueset e UEFA Europa League 2010–11.
Në sezonin e fundit, veç kampionatit, i pari në historinë e tyre, ata arritën të fitonin edhe Kupën e Andorrës, të cilën e kanë fituar edhe tre herë të tjera.
Sipas “Transfermarkt” vlera e skuadrës nga Andorra shkon në rreth 4.5 milionë euro.
Datat e kualifikueseve të Champions League:
18 qershor – Shorti i raundit të parë kualifikues
19 qershor – Shorti i raundit të dytë kualifikues
9/10 korrik – Ndeshjet e para të raundit të parë kualifikues
16/17 korrik – Ndeshjet e dyta të raundit të parë kualifikues
22 korrik – Shorti i raundit të tretë kualifikues
23/24 korrik – Ndeshjet e para të raundit të dytë kualifikues
30/31 korrik – Ndeshjet e dyta kualifikuese të raundit të dytë
5 gusht – Shorti i raundit të Play-off
6/7 gusht – Ndeshjet e para të raundit të tretë kualifikues
13 gusht – Ndeshjet e dyta të raundit të tretë kualifikues
20/21 gusht – Ndeshjet e para të raundit të play-off-it
27/28 gusht – Ndeshjet e dyta të play-off-it
29 gusht – Shorti i fazës së Ligës
Shkarkimi dhe publikimi i teksteve nga Albanian Post nuk lejohet pa përmendur burimin. Faleminderit për respektimin e etikës së profesionit të gazetarit.
/Albanianpost.com
